Эрүүл мэндийн яамнаас өнөөдрийн байдлаар улсын хэмжээнд 1022 иргэн ажиглалтад байна. Тусгай үүргийн эхний онгоцоор ирсэн 267 иргэнийг ХӨСҮТ, Жаргалант сувилал зэрэг тусгаарлах байруудад тусгаарласан, биеийн байдал тогтвортой байгааг мэдээллээ. энэ үеэр Улсын хоёрдугаар төв эмнэлгийн ерөнхий захирал С.Энхболд "Өндөржүүлсэн бэлэн байдалтай холбогдуулан үйлчлүүлэгчдийн гурван орц гарцаар үйлчилдэг байсныг нэг гарцаар үйлчлүүлдэг болгосон. Эргэлтийн цагийг богиносгож, 17.00 цаг болгосон. Мөн 280 ор дэлгэн ажиллах тушаал авснаас эрчимт эмчилгээний тасгийн 50 ор, хөнгөн болон хүнд өвчтөнд 230 ор сулласан. Халдвар тархсан тохиолдолд ашиглахаар 100 ор сулласан. Эмч, сувилагчийн баг 24 цагаар ажиллаж байна" гэлээ. 

Харин Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл "Иргэд хоорондын зайг 1.5-2 метрийн зай барих хэрэгтэй. Хүүхдүүд тоглоомын талбайд бөөгнөрч, залуус олноороо цуглаж байна гэх гомдол мэдээлэл их ирж байна. Халдварын эрсдэлтэй үед иргэн бүр хариуцлагатай байж, үр хүүхдэддээ анхаарал хандуулах ёстой. БНСУ-аас ирсэн 281 иргэний нэгнээс нь халдвар илэрсэн. Гэхдээ халдвар илэрлээ гэж иргэд айх хэрэггүй. Эрүүл мэнд, онцгойгийн ажилчид үүргээ сайн биеьлүүлж, та бүхнийг хамгаална. Гол нь иргэд үүргээ биелүүлж хариуцлагатай бай" гэлээ.

Г.Маргад