Коронавирусний цар тахлын энэ цаг үед Шадар сайд Ө.Энхтүвншингээр даргалуулсан Улсын онцгой комиссоос шат дараатай арга хэмжээг авч хэрэгжүүлж эхэлсэн. Сүүлд буюу өчигдөр Нийслэлийн Засаг дарга С.Амарсайхан баар, караокег нээсэн даруйдаа буцаан хаасан нь олон нийтийн зүгээс шүүмжлэл дагуулаад байгаа юм.

Харин Улсын онцгой комиссын зүгээс гадаадад гацсан иргэдээ чартер нислэгээр эх оронд нь авчрах ажлыг иргэний агаарын тээврийн “МИАТ” компанийн оролцоотойгоор зохион байгуулж эхэлсэн байдаг. Уг ажлын хүрээнд энэ сарын 3-нд Улаанбаатар-Франкфурт чиглэлийн нислэгээр 261 иргэн орондоо ирээд байгаа юм. Үүнд өндөр настан болон асран хамгаалагчтай 39, эрүүл мэндийн шалтгаантай 58, жирэмсэн 22, хөгжлийн бэрхшээлтэй болон асран хамгаалагчтай 3, бага насны хүүхэдтэй болон гэр бүл 62, хүндэтгэн үзэх бусад шалтгаантай 77 хүн багтжээ.

Дээрх 261 иргэний дунд Авсралид гацсан “The HU” хамтлагийнхан багтаж ирсэн тухай мэдээлэл цацагдсан нь олон нийтийн анхаарлын төвд ороод байлаа. Гэвч хамтлагийн продюсер, гавьяат жүжигчин Б.Дашдондог “Ийм худал мэдээлэл тарсанд гайхаж байна. Тэд эх орондоо ирээгүй, худал мэдээлэл. “The Hu” хамтлагийнхан эх орондоо ирэх хүсэлт гаргасан нь үнэн. Улсаас нааштай шийдвэр гаргахыг хүлээж байна” хэмээн байр сууриа илэрхийлсэн нь нэг хоногийн өмнөх үйл явдал.

Сонирхолтой нь, “The HU” хамтлагийнхан чартер нислэгээр ирсэн 261 иргэний тоонд багтаж, эх орондоо газардсаныг Гадаад харилцааны яамны Консулын газрын дарга Л.Мөнхтүшиг нотлов. Тэрбээр ““The Hu” хамтлагийн талаар хэвлэл мэдээллийн хэрэгслээр маш их ярьж байгаа. Монголын “The Hu” хамтлаг дэлхийн олон улс орноор аялан тоглолт хийж байгаад Австрали улсад хоёрдугаар сарын дундуур очсон. Тэр үед Австрали улс хилээ хаагаагүй байсан. Тэднийг очоод удаагүй байхад цар тахлын улмаас Австрали улс дахь бүх тоглолтууд цуцлагдсан. Мөн олон улсын нислэгүүд зогсч, эх орондоо ирэх боломжгүй болсон.

Австрали улсын Элчин сайдын яаманд хамгийн анх хандаж бүртгүүлсэн 30 хүний тоонд “The Hu” хамтлагийнхан багтсан байдаг. Тус хамтлагийнхан өнгөрөгч хоёрдугаар сараас хойш эх орондоо ирэх хүсэлтийг тавьсан. Өнгөрсөн хугацаанд БНХАУ-ын Ухань хот руу ниссэн тусгай үүргийн онгоцоос хойш 12 удаагийн нислэг үйлдсэн. Энэ бүх нислэгт “The Hu” хамтлагийг “Хүндэтгэх шалтгаантай иргэд биш” гэдэг тайлбарыг хэлж, оруулаагүй. Хамтлагийн залуус бидний хүсэлтийг маш хүндэтгэлтэй хандаж ирсэн. Өнөөдөр тавдугаар сар гарчихлаа. Өнгөрсөн хоёр сар гаруйн хугацаанд “The Hu” хамтлагийнхан тэвчээртэй хүлээсэн.

Улсын онцгой комиссоос тус хамтлагийн удаа дараагийн хүсэлтийг хүлээн авч, харгалзан үзэх шаардлагатай гэж эх оронд нь авч ирсэн. Иргэдийн хувьд хэн нэгэн хүнийг гомдоогоод эх орондоо ирсэн гэж битгий ойлгоорой. Тэд өмнөө маш олон хүмүүсийг хүндэтгэн, явуулсан” гэсэн юм. Өөрөөр хэлбэл, “Тhe HU” хамтлагийг эх оронд нь авчрахгүй бол продюсер Б.Дашдондогийг гудамжинд гарч тэмцэхэд хүргэсэн уг асуудал ийнхүү шийдэгджээ.

Хамгийн гол нь, гавьяат Б.Дашдондог яагаад “The HU” хамтлагийг эх орондоо ирээгүй хэмээн булзайруулж, ташаа мэдээлэл гэж үгүйсгэн, худлаа ярьсанд гайхах хүн олон байна. Тэгтлээ үгүйсгэж, нууцлах шалтгаан байсан уу? Эсвэл аялан тоглолт хийх явцдаа коронавирусний уршгаар Австралид гацсан "The HU" хамтлагийнхан, хүндэтгэх шалтгаантай найман хүний өмнүүр орж, Монголд, эх орондоо ирсэн нь гол асуудал байв уу?. Энэ бүгдийг гавьяат Б.Дашдондог л мэдэж байгаа.

Г.Эрхэс