УИХ-ын гишүүн Н.Номтойбаяр яллах дүгнэлтийн талаар олон нийтэд мэдээллээ.

"Өнгөрсөн долоо хоногт миний бие УИХ-ын сонгуульд бие даан нэр дэвших талаар болон "Цензургүй яриа" нэвтрүүлэгт орсноос хойш нийслэлийн прокурорын газар, АТГ-т их дуудагдах боллоо. Энэ оны нэгдүгээр сарын 13-ны өдөр Ерөнхий прокурор Б.Жаргалсайхан миний бүрэн эрхийг түдгэлзүүлэх саналыг УИХ-д өргөн барьсан.

Миний бие 2019 оны арванхоёрдугаар сарын 12-нд Төрийн ордонд хууль бус үйлдэл явагдаж байгаа талаар мэдээлэл хийсэн.

АТГ-ын дарга З.Дашдаваа, Улсын Ерөнхий прокурор Б.Жаргалсайхан нарт хандаж "Ичихгүй бол миний бүрэн эрхийг түдгэлзүүлэх саналыг оруулж ирээрэй" гэж гэсэн. Гэтэл УИХ-ын гишүүнийхээ бүрэн эрхээр түрий барьж хэрэг бүртгэх, мөрдөн байцаах ажиллагаанд саад учруулсан, нөлөөлөх гэж оролдсон гэж миний бүрэн эрхийг түдгэлзүүлэх саналдаа оруулсан.

Миний Төрийн ордонд хийсэн мэдэгдэл хууль зөрчсөн байж болошгүй талаар өмгөөлөгч Д.Батхуяг нийслэлийн Прокурорын газарт гомдол гаргасан юм билээ. Дараа нь арванхоёрдугаар сарын 26-нд хууль зөрчөөгүй, Үндсэн хуулиар олгогдсон эрхээ эдэлсэн байна гээд нийслэлийн Прокурорын газрын тогтоол гарсан байна. Үүнийг олж авлаа.

Энэ үйл явц Ерөнхий прокурор Б.Жаргалсайхан өөрөө хууль тогтоох байгууллага УИХ-д худал мэдээлсэн.

Намайг гүтгэн доромжилсон. Хуулийн өмнө бүгд эрх тэгш байх ёстой. Намайг Хөдөлмөр, нийгмийн хамгааллын сайд байхдаа хууль зөрчсөн гэж хэлмэгдүүлж байгаа бол нотлох баримт дээр нь үндэслэн би ч гомдол гаргах эрхтэй. Энэ талаар АТГ-т гомдол гаргалаа.

Өнгөрсөн дөрөвдүгээр сарын 20-ны өдөр У.Хүрэлсүхийн Засгийн газраас намайг сайд байхдаа хийсэн гэж буруутгасан шийдвэртэй яг адилхан шийдвэрийг гаргасан. Хоёр л зүйл өөр. Харин сайдын нэр, он сар, өдөр нь л өөр. Тухайн шийдвэрийг буруутай гэж үзэхгүй байж намайг буруутай гэж яллаж байгаад гайхаж байна. Намайг хэлмэгдүүлж яллахдаа мэдэгдэхгүйгээр яллачихаад дараа нь мэдэгдсэн” гэлээ.

Б.Лхам