Засгийн газрын энэ долоо хоногийн ээлжит хуралдаанаар цар тахлын эсрэг авах хариу арга хэмжээний хоёр дахь арга хэмжээг танилцуулсан. Энэ үеэр 0-18 насны хүүхдүүдэд зургаан сар 100 мянган төгрөг өгөх, нийгмийн халамжийн дэмжлэг туслалцаа зайлшгүй шаардлагатай бага орлоготой 122 мянган хүнд сар бүр олдог хүнсний талоны мөнгийг хоёр дахин нэмэгдүүлж 32 мянган төгрөг, хүүхдэд найман мянган төгрөг олгодгийг 16 мянга болгож өсгөх, нийгмийн халамжийн тэтгэврүүдийг 100 мянган төгрөгөөр нэмэгдүүлэх зэргээр тусламж зайлшгүй шаардлагатай бүлэгт чиглэсэн шийдвэр гаргасан. Уг шийдвэртэй холбогдуулан зарим улстөрч, мэргэжилтнүүдийн шүүмжлэлтэй хандаж сонгууль хүртэл л үргэлжлэх амлалт гэж үзсэн ч иргэдийн амьжиргаа буурч байгаа энэ үед иргэдэд таалагдах шийдвэр болсон нь дамжиггүй юм.

Түүнчлэн Гэр бүл, хүүхэд залуучуудын газраас эрсдэлт бүлэгт амьдарч байгаа хүүхдийг илрүүлэх, хэрэгцээг тодорхойлох түргэвчилсэн үнэлгээ хийж, 90 өрхөд тусламж үзүүлээ. Уг үнэлгээнд улсын хэмжээнд нийт 109.991 өрх хамрагдсанаас нийт өрхийн 20 мянга нь эрсдэлтэй, 50 мянган өрх цаашид хөл хорио тогтоох ажил үргэлжилбэл эрсдэлт нөхцөл рүү шилжих магадлалтай гэсэн дүн гарчээ. Эрсдэлт бүлэгт багтсан гэр бүлийн гишүүдийн 94 орчим хувь нь 31-35 насныхан, зургаа орчим хувь нь 40-46 насныхан байгаа бөгөөд нэг өрхөд дунджаар 0-18 хүтэлх насны 2-7 хүүхэд амьдарч байна. Ер нь хүүхдийн 20 мянган төгрөгөөр амьжиргаандаа зарцуулдаг олон мянган өрх бий.

Дээр нь ажилгүйдэл улам бүр нэмэгдэж байгаа энэ үед Засгийн газраас гаргасан хүүхдийн мөнгийг 100 мянган төгрөг болгох шийдвэр цаг үеэ олсон нь уг судалгаанаас харагдаж байна.

Мөн ирэх даваа гарагаас эхлэн Ерөнхий боловсролын төгсөх ангийн сурагчдад элсэлтийн ерөнхий шалгалтад зориулсан нэг сарын танхимын сургалт орох шийдвэр гарлаа. Учир нь хөл хорионы дэглэмийн улмаас ялангуяа төгсөх ангийн сурагчдад муугаар нөлөөлж байгаа талаар эцэг, эхчүүдийн санал гомдол их байсан. Тиймээс хөл хорионы дэглэмийг сайтар баримталж, сахилга баттайгаар төгсөх ангийн сурагчдад давтлага өгч болно гэж үзжээ. Сургалтын үеэр Улсын онцгой комиссоос гаргасан хүн хоорондын зайг сайтар сахих бөгөөд нэг ангид 10-15 сурагч суулгаж, давтлага оруулахаар төлөвлөөд байна. Ингэхдээ нэг сурагч дээд тал нь гурван хичээл сонгох боломжтой юм. Ингэснээр хүүхдүүд багштайгаа илүү ойр тулж ажиллах боломж бүрдэх бөгөөд элсэлтийн ерөнхий шалгалтдаа өндөр амжилт үзүүлнэ гэсэн найдлага байна. Мөн өмнө нь БУСШУЯ-аас сурагч тус бүрт элсэлтийн ерөнхий шалгалтдаа бэлдэж болох жишиг даалгавар өгсөн бөгөөд одоо хүүхдүүдийн хувийн зохион байгуулалт, хичээл зүтгэлээс шалтгаалах юм.

Түүнчлэн орон байргүй, тэнэмэл иргэдэд зориулсан тусгай орон сууц барихаар болсон тухай Хотын дарга мэдэгдсэн нь энэ долоо хоногийн онцлох сэдэв байлаа.

Орон байргүй иргэдийг байрлуулах тусгай орон сууцны ажил энэ оноос эхлэх бөгөөд тэднийг нийслэлийн бүтээн байгуулалтад гар бие оролцуулах тухайлбал, ногоо, мод тариулах, зам талбай цэвэрлүүлэх зэргээр нийтэд тустай ажил хийлгэх аж. Өөрөөр хэлбэл, орон байргүй иргэдийг орон гэрээр хангаж оронд нь нийслэлийн бүтээн байгуулалтад ажиллуулах замаар нийгэмшүүлэх юм.

Коронавирусний халдвараас урьдчилан сэргийлэх ажлын хүрээнд нийслэлээс орон байргүй 850 иргэнийг тусгаарлах байранд хамруулж, ариутгал хийх, хоол хүнсээр хангажээ. Эдгээр иргэдийн 80 гаруй хувь нь эрэгтэй, үлдсэн нь эмэгтэйчүүд байгаа юм. Тэдний 46 орчим хувь нь 18-40 насны хөдөлмөрийн насны иргэд байгаа юм. Нийслэлээс хэрэгжүүлж байгаа уг ажилд иргэд талархалтай хандаж байна. Учир нь тэдэнд амьдралаа өөрчлөх хоёр дахь боломж бий болгох, ажлын байраар хангах эргээд нийгэмд тустай ажил хийх нь нийгэмд эерэг хандлага бий болгоно гэж үзсэн юм.

Ийнхүү эрсдэлт бүлэгт ороод байгаа хүүхдүүд Засгийн газрын шийдвэрийн ачаар мөнгөтэй болж, орон байргүй иргэд гэртэй болох нь.

Б.Лхам