Оюутолгой төслийн гэрээ байгуулахад оролцсон тухайн үеийн өндөр албан тушаалтнуудын холбогдсон хэрэг буюу Ерөнхий сайд асан С.Баяр, “Петровис” группийн үүсгэн байгуулагч Ч.Давааням нарын найман хүнд холбогдох эрүүгийн хэргийн шүүхийн урьдчилсан хэлэлцүүлэг Чингэлтэй дүүргийн Эрүүгийн хэргийн анхан шатны шүүхэд  өнөөдөр 09.00 цагаас эхэллээ. Үүнээс өмнө буюу тавдугаар сарын 5-нд шүүхийн урьдчилсан хэлэлцүүлэг болох байсан ч шүүгдэгчдийн нэг болох яллагдагч Д.Ганболд шүүхийн урьдчилсан хэлэлцүүлгийн шүүх хуралд шинээр өмгөөлөгч авсан бөгөөд өмгөөлөгч нь хэргийн материалтай танилцах хүсэлт гаргасан тул шүүх хуралдааныг өнөөдрийг хүртэл хойшлуулсан нь энэ юм. 

Энэ үеэр Ерөнхий сайд асан С.Баяр “Биднийг улсад хохирол учруулсан гэж яллаж байна. Гэтэл хохирлын хэмжээ байхгүй. Хохирогч байхгүй хэрэг. Хэрэв хохирол учирсан гэж үзэж байгаа бол хохирогчоо авч ир” гэвэд сэтгүүлчдийн  асуултад асуултад хариулт өглөө.

-“Петровис” группийн үүсгэн байгуулагч Ч.Давааням гэх хүнийг тантай хамт яллагдагчаар татсан байна. Яагаад юм бол?  

-Миний хар багын найз. Намайг Петровис компанийн шатахууныг Оюутолгойд хэрэглээний үнээс өндөр үнээр шахсан гэсэн. Хэрэв би Ерөнхий сайд байхдаа ийм зүйл хийсэн бол Петровис ашигтай ажилласан болж таарна. Тийм зүйл алга. Түүнийгээ нотлох хэрэгтэй. Багын минь найз учир тэсээд явж байгаа байх. Зөндөө олон зөрчил гарсан. Айхтар гэмт бүлэг байгуулсан гэдэг яллах тогтоолоо хүчингүй болгосон. Тэгэнгүүтээ шинээр баахан ял нэмээд тавьчихлаа. Үүнтэй холбоотой ямар нэгэн гомдол санал хүлээж авалгүйгээр шууд шүүхэд шилжүүлчихсэн байна. Тиймээс урьдчилсан хэлэлцүүлэгт хүсэлтүүдээ тавьж байна.

-Шүүх хурал шударга болно гэдэгт та итгэлтэй байна уу?

-Итгэл найдвар хамгийн сүүлд бөхдөг. Шүүхээс хэрэв гэмт хэрэг хийсэн нь тогтоогдвол надаас эхлээд ялаа хүлээхэд бэлэн байна. Шударга шүүнэ гэдэгт итгэж байна.

Тэрбээр ийм хариулт өгсөн. Тэгвэл шүүхээс гаргасан албан ёсны мэдээлэлд С.Баяр нарын найман хүнд холбогдох хэргийн зүйлчлэлийн талаар тодруулжээ.

Уг мэдээлэлд:

Нийслэлийн прокурорын газраас Ч.Давааням нарт Эрүүгийн хууль (2002 он) 263.2, Эрүүгийн хууль (шинэчилсэн найруулга)-ийн 18.6-2.3, 22.10-1-т зааснаар яллах дүгнэлт үйлдэж, шүүхэд ирүүлсэн.

263 дугаар зүйл. Төрийн албан тушаалтан албаны эрх мэдэл буюу албан тушаалын байдлаа урвуулах

263.2.Энэ хэргийг давтан үйлдсэн,уг хэргийн улмаас их хэмжээний хохирол, хүнд хор уршиг учирсан бол тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ.

18.6 дугаар зүйл. Мөнгө угаах

2.3.албан тушаалтан албаны чиг үүрэг, бүрэн эрх, нөлөөг урвуулан ашиглаж үйлдсэн бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

22.10 дугаар зүйл.Үндэслэлгүйгээр хөрөнгөжих

1.Нийтийн албан тушаалтан өөрийн хөрөнгө, орлого их хэмжээгээр нэмэгдсэн нь хууль ёсны болохыг үндэслэлтэй тайлбарлаж чадаагүй бол үндэслэлгүйгээр нэмэгдсэн хөрөнгө, орлогыг хурааж, нийтийн албанд томилогдох эрхийг хоёр жил хүртэл хугацаагаар хасаж хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.