Ховд аймаг дахь зэвсэгт хүчний 123 дугаар ангийн хугацаат цэргийн алба хаагч даргадаа зодуулсан гэх мэдээллийг Зариг.мн сайт мэдээлсэн билээ. Тэгвэл эл асуудлаар Цагдаагийн ерөнхий газраас тайлбар хийлээ.

Энэ талаар ЦЕГ-ын Урьдчилан сэргийлэх хэлтсийн дарга, цагдаагийн хурандаа Б.Баатархүү “Цагдаагийн байгууллагаас энэ хэргийг шалгаж байна. Энэ оны 4-ний өдөр Ховд аймагт оршин суух иргэн Э нь цагдаагийн байгууллагад өргөдөл гаргасан. Энэ өргөдөл цэргийн алба хаагчийн биед гэмтэл учирсан гэсэн утга агуулгатай. Энэ дагуу цагдаагийн байгууллагаас шалгалт хийж, эрүүгийн хэрэг үүсгэсэн. Болсон хэргийн тухайд “Дөрөвдүгээр сарын 28-29-нд шилжих шөнө дугаар ангийн харуулын цэгт үүрэг гүйцэтгэж байсан байлдагч Б-г түрүүч Б буюу хугацаат цэргийн алба хаагч нь "Харуулын цэргийн сонор сэрэмж алдлаа, харуулын цэг орхиж явсан" гэдэг үндэслэлээр эрх чөлөөнд нь халдаж гэмтэл учруулсан байна. Ховд аймаг дахь цагдаагийн газарт ирсэн гомдлын дагуу шалгалт хийж, эрүүгийн хэрэг үүсгэсэн. Өөрөөр хэлбэл, хугацаат цэргийн үүрэг гүйцэтгэж байгаа байлдаг, түрүүчийн хооронд үүссэн маргаан. Тухайн үед хамт алба хааж байсан гэрчүүд бий. Бидэнд ийм мэдээлэл өгсөн. Ар гэрийнхэнд мэдээллээгүй гэдэг зүйл яригдсан. Үүнийг нь тодруулахад “Цэргийн ангиас гэр бүлд нь мэдэгдсэн. Тиймдээ ч ар гэрээс нь цагдаагийн байгууллагад гомдол гаргасан” гэлээ.