УИХ-ын гишүүн С.Жавхлан "Хонх" хамтлагын дуучин, сэтгүүлч С.Цогтсайханы "Хонхны дуу"-г шинээр найруулж дуулсан билээ. Түүний эл үйлдэл нь бие даагчаас нам руу урвах гэсэн үйлдлээ ийн илэрхийллээ гэж хардах хүн цөөнгүй байсан. Эл хардаль оргүйг баталж тэрбээр өчигдөр буюу энэ сарын 14-нд АН-д элссэн юм. 

Тэгвэл С.Цогтсайхан агсны охин, хүү хоёр "Хонхны дуу"-ны албан ёсны оюуны өмчлөгч юм байна. Гэтэл С.Жавхлан гишүүн уг дууг дуулахдаа хууль ёсны өмчлөгчөөс огт зөвшөөрөл аваагүй учир оюуны өмчлөгч Ц.Сантаа, Т.Түшиг нар шүүхэд хандахаар болжээ.

Тэрбээр манай сайтад "Хууль тогтоох байгууллагын гишүүн атлаа хууль зөрчсөн үйлдэл гаргасан нь ямархуу увайгүй хүн бэ гэдгийг харууллаа. Дүү бид хоёрт гомдолтой байна. Тиймээс оюуны өмчөөр дагнан ажилладаг өмгөөлөгчтэй хамтран ажиллаж байна.

Бид шүүхэд хандана. Гэхдээ мөнгө төгрөг нэхэмжлэх нь гол биш.

Хамгийн гол нь аавын минь уран бүтээлийг хууль бусаар ашиглаж, эрх мэдэл, албан тушаалд ашиглах гишгүүр болгосонд харамсаж байна. Тиймээс хуулийн дагуу хариуцлага хүлээх ёстой" гэсэн юм. 

Хэрвээ эл асуудлаар С.Жавхлан гишүүн шүүхэд дуудагдаж, сонгуулиас өмнө анхан шатны шүүхийн шийдвэр хүчин төгөлдөр болбол тэрбээр сонгуулийн жагсаалтаас хасагдах нигуурьтай. Учир нь УИХ-ын сонгуулийн тухай хуульд тухайн нэр дэвшигч хууль зөрчсөн үйлдэл нь шүүхээр тогтоогдож, анхан шатны шүүхийн шийдвэр хүчин төгөлдөр болсон цагаас эхлэн нэр дэвших боломжгүй болно гэсэн утга агуулга бүхий заалт орж ирсэн юм.

Ингээд С.Цогтсайхан агсны охин Ц.Сантаагийн өөрийн цахим хуудсаар дамжуулж дараах мэдэгдэл гаргасныг хүргэе.

С.Жавхлан гишүүн "Хонхны дуу"-г 

Хонхны дуутай хамт үзэл санаа явдаг!

УИХ гишүүн, дуучин С.Жавхлан хэд хоногийн өмнө “Хонхны дуу”-г дуулан өнөөдөр харин АН-д элсэв. Элсэхдээ АН-ын дарга С.Эрдэнэд “Хонхны дуу”-г монгол бичиг, кирилл үсгээр бичсэн дурсгалын жааз бэлэглэж, С.Эрдэнэ дарга түүнийг нь мөргөн хүлээн авав.

“Юутай доромжлол, юутай харамсал!” гэсэн аавынхаа “Доромжлол” нийтлэлийн үгээр энэхүү харууслын бичвэрээ эхлүүлье.

Хэдхэн хоногийн өмнө С.Жавхлан аавын минь “Хонхны дуу”-г дууны эрхийг эзэмшигч гэр бүлийнхэнд нь ямар ч хэл хүргэхгүйгээр дураараа дуулж, клипээ сошиалаар цацаж, аавын минь дууг улс төрийн зорилгодоо хууль бусаар ашигласан нь нь хууль батлах төрийн дээд байгууллагын төлөөлөгч, УИХ гишүүнээ байг гэхэд оюуны өмчийн тухай хууль сайн мэддэг байх ёстой дуучин хүн ийм бүдүүлэг үйлдэл гаргасанд үнэнхүү гайхширч дургуйцлээ илэрхийлсэн билээ. Олон ч хүн түүний энэ үйлдлийг буруушааж байсан.

Өнөөдөр харин бүх зүйлийн учир тайлагдаж, клип бол АН-д элсэхийн өмнөх жүжиг байсан нь ил боллоо. АН-ын удирдлага, С.Жавхлан хоёрын тохиролцоо байж. Аав минь Ардчилалын үзэл санааг Монгол Улсад түгээгч улс төрийн сэтгүүлч, үзэл санаагаа дуугаараа дамжуулж орон даяар давалгаалуулж чадсан ардчиллын дууч байсан юм. Түүнээс биш дуу дуулж явсан “Хонх” хамтлагийн дуучин С.Цогтсайхан байгаагүй юм.

Хонхны дуу бол Ардчилсан намд орохын тулд дуулдаг дуу ч биш, АН-ын өмчилсөн дуу нь ч биш! Хонхны дуу бол хүмүүнлэг, иргэний ардчилсан нийгмийг байгуулах түүнийг арчилж хамгаалах сэтгэлтэй хүмүүсийн дуулах дуртай дуу нь явж ирсэн!. Үүнд нь би маш их баярлаж, талархаж явдаг!.

Өнөөдөр миний хувьд хүнд өдөр байв. Учир нь аавын минь үзэл санаа шингэсэн Хонхны дууг Жавхлангаар дуулуулж, АН-д элсүүлж, нэр дэвших тойрог бэлэглэж байгаатайгаа яг давхцуулан аавын минь үзэл санааг тээж, түгээж ирсэн үеэл ах М.Тулгатыг АН-аас Баянзүрх дүүрэгт нэр дэвших эрхийг нь хааж, оронд нь тус дүүрэгтэй ямар ч хамааралгүй улстөрчдийг шууд оруулж ирж “хоёр өнгөтэй” шоу хийж байгааг хараад туйлын бухимдаж байна.

М.Тулгат ах маань Япон улсад сурч боловсорсон, өөрийн гэсэн үзэл санаа, итгэл үнэмшилтэй, тэнгэрт дэвшсэн өвөө, эмээ, манай гэр бүлийнхний, аавын маань хийх гэснийг хийж гүйцээнэ гэж итгэж ирсэн хүү нь, хүндэлж явдаг ах минь билээ. Сүүлийн хоёр удаагийн орон нутгийн сонгуульд АН-аас Баянзүрх дүүрэгт нэр дэвшин сонгогдож иргэдийн жаргал, зовлонд ойр байж дүүрэг, НИТХ-ын төлөөлөгчөөр идэвх зүтгэлтэй ажилласан. Ингэхдээ АН-ын шинэчлэлийн бодлогууд болон сүүлийн хоёр удаагийн сонгуулийн мөрийн хөтөлбөрт гар бие оролцон, энэ намыг бэхжүүлэх ажилд зүтгэж ирсэн юм.

Би "Хонхны дуу"-г бохир улс төрийн аргадаа ашиглах үйлдлүүдийн эсрэг цаашдаа хүчтэй тэмцэх болно. Энэ бол миний аавынхаа өмнө хүлээсэн үүрэг юм!. Аавын минь үзэл санааг дэвсэж, хийсэн бүтээснийг нь буруу зүйлдээ ашиглах хүмүүстэй тэмцэхээ илэрхийлж байна.

“Хонх”-ын Цогтсайханы охин Сантаа, 2020.5.14" гэжээ.