УИХ-ын намрын чуулган яг одоо нээлтээ хийж байна. Чуулганы хуралдааныг нээж УИХ-ын дарга Г.Занданшатар үг хэлж байна.

Тэрбээр банкны зээлийн хүүг бууруулах бодлого барьж байгаа. Үүний хүрээнд ипотекийн зээлийн хүүг зургаан хувь болгон бууруулахаар УИХ, Засгийн газар хамтран ажиллаж байна. Зарчимын хувьд шийдэлд хүрээд байна гэдгийг онцоллоо.

Монгол Улс саарал жагсаалтаас гарах тайлангаа өнгөрсөн дөрөвдүгээр сард амжилттай хамгаалсан. Зургаан үүрэг даалгавраас дөрөвийг нь биелүүлээд байгаа. Үүнийг газар дээр нь хянаж шалгахаар албаны хүмүүс ирж ажиллаж байна.

Монгол Улсын Үндсэн хуулийн нэмэлт өөрчлөлтийн агуулга үзэл санаанд холбогдох хууль тогтоомжийг нийцүүлэн эрх зүйн шинэтгэл 2 төслийг бид хэрэгжүүлэхээр төлөвлөсөн. Засаг захиргаа нутаг дэвсгэр нэгжийн удирдлагын тухай хуулийн шинэчилсэн найрууллагыг хойшлуулж, хугацаа алдмааргүй байна. Энэ хуулиар орон нутагт эрх мэдлийг шилжүүлж, төвлөрлийг сааруулж, нутгийн удирдлагын оновчтой тогтолцоо бүрдэнэ.

Аймаг, нийслэл, сум, дүүрэг бие даан хөгжих нөхцлийг бүрдүүлснээр төвлөрөл саарч, түгжрэл гацаа арилж, амьдралын чанарт эрч өөрчлөлт гарна гэж үзэж байгаа юм.

Түүнчлэн хот тосгоны болон нийслэлийн эрх зүйн байдлын тухай хуулиудыг шинэчилж, аймгийн төвүүд, Дархан, Эрдэнэтийг хот болох асуудлыг энэ чуулганаар шийдвэрлэх болно" гэв.  

Энэ удаагийн намрын чуулган шинэ дэгээр хуралдах бөгөөд ажлын 75-аас доошгүй хоног чуулах юм. Харин 112 хууль, тогтоолын төсөл хэлэлцэхээр төлөвлөжээ.

Б.Батчимэг