Дэлхий нийтэд дэгдсэн цар тахалтай холбогдуулан нэгдүгээр сараас есдүгээр сар хүртэл чимээгүй байсан түгжрэл дахин эхэллээ. Хичээлийн шинэ жил дуусах хүртэл буюу ирэх зун хүртэл тэвчихээс өөр сонголтгүй бололтой.

Аль замыг сонгосон ялгаагүй хаа хүрэхээс хамаарч 2-3 цаг зарцуулж байна. Магадгүй өмнөх жилүүдийнхээс ч илүү түгжирч байгааг үгүйсгэхгүй. Замын ачаалал жил ирэх тусам нэмэгдэж байгаа нь импортоор орж ирж байгаа автомашины тоо буурахгүй байгаатай холбог үзэж болох юм.

Өнгөрсөн онд 140 мянга гаруй тээврийн хэрэгсэл орж иржээ. Үүний дөрөв орчим хувь нь буюу 4196 нь бүрэн бус, эвдрэл гэмтэлтэй тээврийн хэрэгсэл эзэлж байна. Энэ оны есдүгээр сарын байдлаар улсын хэмжээнд 1.120.116 тээврийн хэрэгсэл бүртгэлтэй байна. Үүнээс 54 хувь нь буюу 603.764 нь нийслэлд бүртгэлтэй байдаг аж.

Үүнээс гадна хөдөө орон нутгаас нийслэлийг зорих тээврийн хэрэгсэл байна. Эдгээрийг бүгдийг нь зохицуулах шаардлага тулгарч байна.

Уг нь замын хөдөлгөөний ачааллыг бууруулахын тулд торгуулиа төлөөгүй жолоч нарыг хотын төв хэсэг рүү орохыг хориглосон ч иргэдийн эсэргүүцлээр хэрэгжээгүй. Одоо зохицуулж буй ганцхан арга болох тээврийн хэрэгслийн сүүлийн орноор нь долоо хоногт нэг удаа хөдөлгөөнд оролцуулахыг хориглох нь хүртэл үеэ өнгөрөөж. Үүнээс өөр зохицуулалт шаардлагатайг өнгөрсөн өдрүүдэд үргэлжилсэн нийслэлээрээ түгжирсэн тэг зогсолт харууллаа.

Өнгөрсөн онд автомашиныг улсын дугаараар нь тэгш, сондгойгоор хөдөлгөөнд оролцуулах талаар яригдаж байсан. Хэчнээн цагаар наашаа ч үгүй, цаашаа ч үгүй түгжирч байхаар тэгш, сондгойгоор хөдөлгөөнд оролцдог болвол яасан юм. Харин нийтийн тээврийнхээ халаалт, тав тухтай байдал зэрэг бусад асуудлаа холбогдох хүмүүс нь дор бүрнээ зохицуулаад яваг. Дорвитой алхам хийхгүй л бол ирэх жилийн зун хүртэл хүлцэнгүй тэвчихээс өөр нийслэлчүүдэд сонголт алга.

А.Сүх