“Төрийн мөнгө уйлдаггүй” гэдгийг хэн үргэлжлүүлэн нотлох бол

 

Сүүлийн өдрүүдэд олон нийт “Төрийн мөнгө уйлдаггүй” гэдгийг жинхэнэ утгаар нь харж, халаглаж сууна. Хэдхэн хоногийн өмнө Уул уурхай, хүнд үйлдвэрийн сайд Г.Ёндон "Монголросцветмет" ТӨҮГ-ын орлогч захирлаар ажиллаж байхдаа албаны 10.7 сая төгрөгөөр хоёр хүүхдийнхээ сургалтын төлбөрийг төлүүлсэн гэх мэдээлэл цацагдаж, олны дургүйцлийг төрүүлээд байсан.

Гэтэл энэхүү дуулианы чимээ намжиж амжаагүй байтал дахин төрийн мөнгөөр тансаглаж, фитнессийн төлбөрөө улсаар төлүүлсэн гэх Хадгаламжийн даатгалын корпорацийн захирал Х.Бум-Эрдэнийн талаарх мэдээлэл цахим орчинд цацагдаж, гал мэт дүрэлзэж байна.

Хадгаламжийн даатгалын корпорацийн захирал Х.Бум-Эрдэнэ оффшорчин уу

Фитнессийн төлбөрөө улсаар төлүүлсэн гэх Хадгаламжийн даатгалын корпорацийн захирал Х.Бум-Эрдэнийн талаарх мэдээлэл цахим орчинд олон хүний бухимдлыг төрүүлээд байгаа.

Олон нийтэд ил болоод буй баримтаас үзэхэд, Хадгаламжийн даатгалын корпорацийн захирал Х.Бум-Эрдэнэ 14.8 сая төгрөгөөр 53 удаа спорт заал авч тоглох гэрээ байгуулжээ. Мөн 500 сая орчим төгрөгийн орон сууцны дэмжлэг олгосон бөгөөд тэр дундаа өөрөө 45 сая төгрөгийг нь авчээ. Мөн SHANGRILA SPORT CENTER ийн YOGA өрөөг нэг сараар авахдаа 30 сая төгрөгийн төлбөрийг байгууллагаараа гаргуулсан байна. Мөн 100 мянган төгрөгийн membership картныхаа үнийг хүртэл төлүүлсэн байх аж.

Хадгаламжийн даатгалын корпорацийн захирал Х.Бум-Эрдэнэ нь 2015 онд СЗХ-ны дэд дарга байхдаа АТГ-т гаргаж өгсөн ХОМ-тээ 41 сая 449 мянган төгрөгийн орлоготой хэмээн мэдүүлж байжээ. Харин түүний орлого дөрвөн жилийн дотор дөрөв дахин өсөж, 171 сая 585 мянган төгрөг болсон байна. Түүнчлэн гэр бүлийн гишүүдийн орлого 2015 онд хоёр сая 530 мянган төгрөг байсан бол 2019 онд 17 сая 255 мянга болж, найм дахин өссөн байна. Гэсэн ч тэрбээр иогийн төлбөрөө өөрөө төлж дөнгөлгүй, улсын мөнгөөр төлсөн байх юм.

Энэхүү мэдээлэлтэй зэрэгцэн бас нэгэн таагүй мэдээлэл цацагдсан нь Х.Бум-Эрдэнийн оффшорын асуудал. Тэрбээр оффшор бүс дэх “ABROS” 2007-2016 “GUMAX” 2008-2012 “IMPOX” 2008-2012 “TSAYARS” 2008-2012 “DOLOWAY INTERNATIONAL” 2009-2013 гэсэн таван компанийнхаа талаарх мэдээллийг Хөрөнгө орлогын мэдүүлэгтээ огт дурдаж байгаагүй аж. Харин тэрбээр үүнийгээ дээрх компаниуд нь ямар нэгэн үйл ажиллагаа явуулаагүй. Хятадуудтай нийлж уул уурхайн компани байгуулж, үйл ажиллагаа явуулахаар оффшор бүсэд данс нээсэн ч амжилттай болоогүй хэмээн мэдээлж байсан байна.  

Түүнчлэн Шилэн Цогоо өчигдөр дахин нэг ноцтой баримт дэлгэсэн юм. Тодруулбал, "Х.Бум-Эрдэнэ нь Монголбанкны Ахлах хянан шалгагч Д.Ганбатад 45 сая төгрөгийн орон сууцны дэмжлэг үзүүлжээ. Хянан шалгадаг байгууллагын Ахлах шалгагч нь мөнгө авсан тул шалгахгүй байх нь аргагүй юм" хэмээгээд баримтыг хавсаргасан байна.  

152.6 сая төгрөгийн хадгаламжтай Г.Ёндон сайд төрийн мөнгөөр хүүхдүүдийнхээ сургалтын төлбөрийг төлжээ

Уул уурхай, хүнд үйлдвэрийн сайд Г.Ёндон 2019 оны дөрөвдүгээр сард "Монголросцветмет" ТӨҮГ-ын орлогч захирлаар томилогдсоноосоо хойш таван сарын дараа хоёр хүүхдийнхээ сургалтын төлбөр болох 10,700,000 мянган төгрөгийг байгууллагаасаа буюу 2019 оны есдүгээр сарын 2-нд төлүүлсэн гэх. Г.Ёндон нь “Монголросцветмет” ТӨҮГ-ын орлогч захирлаар байхдаа сард дунджаар 17 сая төгрөгийн цалин хангамжийг авдаг байсан аж.

Ташрамд сонирхуулахад Г.Ёндон нь "Монголросцветмет" ТӨҮГ-ын орлогч захирлаар ажиллаж байх хугацаандаа буюу 2019 оны ХОМ-дээ өөрийн орлогоо 204 сая төгрөг, гэр бүлийн орлогоо 40.3 сая, 460 сая төгрөгийн үнэ бүхий хоёр орон сууц, гурван авто граж, 17 сая төгрөгийн үнэ бүхий нэг "Toyota Prius-1" маркын автомашин, 45 сая төгрөгийн үнэлгээ бүхий 700м2-3 газар, 152.6 сая төгрөгийн хадгаламж, 13 сая төгрөгийн авлага, дөрвөн тусгай зөвшөөрөл, эрх, патенттай. Зээлгүй, компани нөхөрлөл хоршоонд оруулсан хөрөнгө оруулалт байхгүй гэж мэдүүлсэн байна.

Ер нь энэ мэтээр улсын мөнгөөр тансаглаж суудаг эрхмүүдэд тавих хараа хяналт гэж байхгүй болсон бололтой. Угтаа аль нэг төрийн албаны толгойд заларвал хаан мэт аашлаж болдог болсны тод жишээ энэ болоод байна. Харин тэдний энэ жагсаалтыг хэн үргэлжлүүлж, аль байгууллагын, хэн гэж даргын тансаглал ил болох бол гэсэн хүлээлт олон нийтийн дунд байгаа нь нууц биш. Цаашлаад энэ мэтээр төрийн мөнгөөр тансаглаж, түрүүвчээ түнтийлгэдэг эрхмүүдийн толгойг илсээр байх уу гэдэг асуудал ч хөндөгдөх нь дамжиггүй буй за. 

Б.Баатар