УУХҮ-ийн сайд Г.Ёндон хүүхдүүдийнхээ сургалтын төлбөрийг төсвийн мөнгөөр төлсөн талаар бид өмнө нь мэдээлсэн билээ. Тэгвэл энэ талаар УУХҮ-ийн сайд Г.Ёндон тайлбар мэдээлэл хийлээ. Тэрбээр “Монголросцветмет” ТӨҮГ нь улсын төсөвтэй, татвартай ямарч хамаагүй албан газар. Энэ газарт 2000 оноос хойш компанийн гүйцэтгэх удирдлага менежментийг урамшуулах, сургалтын төлбөрийг тэглүүлэх гэсэн журам хэрэгжиж ирсэн. Энэ заалтын дагуу компани ашиггүй ажилласан тохиолдолд энэ урамшуулал хөнгөлөлтийг олгохгүй. Харин ашигтай ажилласан тохиолдолд олгодог. Би 2018 онд томилогдсон. “Монголросцветмет” ТӨҮГ нь шилэн дансаа сайн хөтөлдөг. 2019 онд ч нээлттэй ид тод тавигдсан. Харин одоо та бүхэн олж харж байгаа нь сайн хэрэг" хэмээсэн юм. 

УУХҮ-ийн сайд Г.Ёндон энэ үеэр сэтгүүлчдийн сонирхсон асуултад хариулав. 

-Таныг улсын мөнгөөр хүүхдүүдийнхээ төлбөрийг төлсөн гэж буруутгаж байгаа. Харин та албан газрын журам, би хууль зөрчөөгүй гэж үзэж байгаа хэрэг үү? 

-Энэ дотоод журам. Миний хөдөлмөрийн гэрээнд заасан. Би хувь хүнийхээ хувьд болохгүй зүйл хийсэн гэж бодохгүй байгаа. Энэ бол нээлттэй л байсан мэдээлэл. 

-Тэгэхээр журам гэхээр энэ газрынхан байнгын урамшуулал авдаг гэсэн үг үү? 

-2019 онд энэ “Монголросцветмет” ТӨҮГ түүхэндээ хамгийн ашигтай буюу найман тэрбум төгрөгийн ашигтай ажилласан. Тиймээс л сургалтын төлбөрийг хийсэн хэрэг. 

Б.Баатар