УИХ-ын гишүүн А.Адьяасүрэн яллагдагчаар татагдсан тухай Улсын Прокурорын ерөнхий газраас өгсөн мэдээлэл олныг шуугиулсан нь саяхан. Учрыг сийрүүлбэл, түүнийг амин хувийн хэргээ бүтээхийн тулд АТҮТ-ийн нэр бүхий албан тушаалтанд хахууль өгсөн байж болзошгүй хэргээр шалгаж, эрүүгийн хэргийн яллагдагчаар татаад буй юм. Гэвч эрхэм гишүүн бүрэн эрхээрээ түрий барьж яллагдагчаар татсан тогтоолтойгоо танилцахгүй байгаа гэх. 

Түүнчлэн тэрбээр тойрогтоо ажиллах нэрээр 100 сая төгрөгийг зөвлөх Т.Эрдмаагийн дансаар дамжуулж авсан талаар мэдээлэл цахим хуудсанд дэлгэгдээд байна.

Шинэ парламент эмхлэгдэн байгуулагдаад гурван сар гаруйн л хугацаа өнгөрч байна. Энэ хугацаанд орон нутгийн сонгууль болон бусад асуудлаар гишүүд гэлтгүй Ерөнхийлөгч, Ерөнхий сайд хүртэл аймгуудад ажилласан. Дээрх асуудал олон нийтэд ил болсонтой холбогдуулан бусад гишүүд, сайд дарга нар ч ялгаагүй ийм хэмжээний мөнгийг зөвхөн томилолтын зардал өвөртөлдөг үү гэдэгт иргэд хариулт эрж байна.  

Ирэх оны төсвийг эрх баригч намаас 2.1 их наядын алдагдалтай оруулж ирсэн. Мөн 2024 он хүртэл улсын төсвийн алдагдал 10 гаруй их наяд төгрөгт хүрэх урьдчилсан тооцоо гаргаад байгаа билээ.

Түүнчлэн дэлхий нийтэд цар тахал дэгдсэний улмаас эдийн засаг хумигдсан, хүнд нөхцөлд аль болох орлого олдог эх үүсвэрээ санхүүжүүлэх, үр ашигтай, сахилга баттай зарцуулахыг эдийн засагчид сануулсаар буй.

Үндсэн хуульд зааснаар Монгол Улсын иргэн дөрвөн үүргийг ёсчлон биелүүлэх үүрэгтэй. Өөрөөр хэлбэл, заавал биелүүлэх дөрвөн үүрэг гэсэн үг. Үүний нэг нь татвар төлөх юм. “Төрийн мөнгө гэж байхүй. Татвар төлөгчийн мөнгө гэж байдаг”. Үүргээ биелүүлсэн иргэд татварт төлсөн мөнгөө зов зохистой ашиглах, захиран зарцуулахыг төрөөс шаардах эрхтэй. Энэ эрхээ эдэлж татвар төлөгчдийн мөнгийг хэрхэн зарцуулснаа, мөн жилд гишүүдийн томилолтод хэдий хэмжээний зарлага гаргадгийг тайлагнахыг иргэд шаардаж байна.

Б.Лхам