АН-ын дарга Д.Ганбат эрх баригч намын хэд хэдэн гишүүнийг эгүүлэн татахаар ярьж байгаа талаар мэдээлсэн. УИХ дахь МАН-ын бүлгээс мэдээлэл хийж, гишүүдийг эргүүлэн татах асуудлыг яриагүй болохыг хэлсэн юм. Ямартай ч, эргүүлэх татах магадлалтай гишүүд хэн бэ гэдэг асуулт олон нийтийн дунд хөвөрч эхэллээ. 

Сургаар бол Г.Амартүвшин, Сү.Батболд, А.Адьяасүрэн нарыг эргүүлэн татах магадлалтай гишүүнээр нэрлэж байна.

УИХ-ын гишүүн Г.Амартүвшингийн иргэншлийн асуудлыг дахин сөхсөн үү

УИХ-ын гишүүн Г.Амартүвшин 2020 оны УИХ-ын сонгуульд Хан-Уул дүүрэгт МАН-аас нэр дэвшиж, ялалт байгуулсан. Тухайн үед Г.Амартүвшинг Нидерландын вант улсын иргэншилтэй гэх мэдээлэл гарч, нэг хэсэг “дүрэлзсэн”. Гэсэн ч тэрбээр үүнийг үгүйсгэж дөнгөсөн билээ. Эл асуудал Г.Амартүвшин УИХ-ын гишүүн болсноор намжаад байсан ч дахин сөхөгдсөнөөр гишүүнээс нь эргүүлэн татах тухай шум чих дэлсэж эхэллээ.

“Оюутолгой”, Чингис зочид буудлын газрын хувьчлал Сү.Батболдыг гишүүнээс нь унагах уу

УИХ-ын гишүүн Сү.Батболдыг “Оюутолгой”, Чингис зочид буудлын газрын хувьчлалын асуудлаар хуулийн байгууллагаас шалгаж байгаа гэх мэдээллийг сүүлийн үед цацах болсон. Тодруулбал, Оюутолгойн хөрөнгө оруулалтын гэрээг байгуулах үед “Рио Тинто” компаниас нэр бүхий хүмүүс авлига авсан байж болзошгүй гэх дүгнэлтийг АНУ-аас ирүүлсэн аж. Уг хэргийг прокуророос хянаад Иргэний хэргийн шүүхэд шилжүүлсэн байна. Эл асуудлаар албаныхан тоймтой мэдээлэл өгөөгүй ч түүнийг дээрх асуудалтай холбогдуулан эргүүлэн татах магадлалтай гэх.

УИХ-ын гишүүнээс нь татах магадлалтай эрхмүүдийн жагсаалтад А.Адъяасүрэнгийн нэр дээгүүрт явна

УИХ-ын гишүүн болсон цагаасаа олны анхаарлын төвөөс гараагүй А.Адъяасүрэнгийн нэр энэ удаа ч мөн УИХ-ын гишүүнээс татагдах магадлалтай эрхмүүдийн жагсаалтад дээгүүрт явна. Түүний 285 сая төгрөгийн авлига өгсөн гэх асуудал өнгөрсөн хавраас эхлэн сөхөгдөж, хуулийн байгууллагаар шалгуулж буй.  Одоо ч энэ хэргийг шалгаж байгаа талаар Нийслэлийн прокурорын орлогч Ц.Насанбат “УИХ-ын гишүүн А.Адъяасүрэнд холбогдох хэрэг мөрдөн байцаалтын шатанд яваа” гэсэн мэдээллийг өгсөн. Өөрөөр хэлбэл, авлига өгсөн гэх асуудал одоо ч хуулийн байгууллагад шалгагдаж байгаа гэсэн үг. Тэрбээр УИХ-ын гишүүний халдашгүй эрх гэсэн “хамгаалалттай”-гаар хуулийн байгууллагад шалгагдаж буй аж.

Гэхдээ эл асуудлыг эцэслэж, гишүүнээс нь эргүүлэн татах магадлалтай гэж хардах хүн цөөнгүй байгаа юм.

Б.Баатар