Орон нутгийн сонгуулийн үр дүнд Баянгол дүүргийн иргэдийн итгэлийг хүлээж, төлөөлөгчөөр сонгогдсон Э.Магнайбаярыг эргүүлэн татуулахаар хуульчид болон сонгогчдын төлөөлөл нэгдэж, мэдээлэл хийлээ.  

Иргэдийн төлөөлөл Э.Магнайбаярт итгэл хүлээлгэсэндээ харамсаж байна. Энэ хүн МАХН-аас нэр дэвшиж ялалт байгуулсан ч МАН-д гишүүнээр элссэн нь сонгогчдын итгэлийг худалдсан үйл явдал боллоо. Монгол Улсад энэ жишиг тогтохоос сэргийлж, түүнийг эргүүлэн татуулах хүсэлтэй байгаа гэдгээ уламжлав. 

Баянгол дүүргийн 23-дугаар хорооны иргэн "Баянгол дүүргийн иргэдийн итгэлийг хүлээж, төлөөлөгчөөр сонгогдсон Э.Магнайбаярыг сонгогдсонд иргэд бид баярлаж байсан. Гэтэл сонгогдсон намаа сольсон нь иргэдийн итгэлийг уландаа гишгэсэн үйлдэл явдал боллоо. Тиймээс Э.Магнайбаярыг эргүүлэн татуулах, дахин сонгууль явуулах үндэслэлтэй гэж үзэж байна. Тэрбээр 922 хүний санал авч сонгогдсон. Эдгээр хүмүүсийн саналыг, сонгогчдын итгэлтэй хамт МАН-д худалдсан гэж хардаж байна.

Иргэн Ц.Оюунцэцэг: Би 23 дугаар хороонд 20 дахь жилдээ амьдарч байна. Сонгох сонгогдох эрхээ эдэлсэн бидний саналыг хувийн эрх ашгийнхаа төлөө худалдчихлаа. Энэ нь Монгол Улсад байгаагүй гутамшигтай үйл явдал боллоо. Өнөөдөр сонгогчдынхоо итгэлийг ялсан намд худалдаж байгаа хүн маргааш эх орноо ч худалдахад бэлэн юм байна гэж үзэж байна. Үнэхээр сонгуулийн дараа энэ мэтээр иргэдийн итгэлийг наймаалцаад байвал сонгууль явуулсны ч хэрэг байхгүй шүү дээ. Үүнийг шат шатны байгууллагууд нь анхааралдаа авч арга хэмжээ авч өгөөчээ гэж хүсч байна. Хэрэв бидний шаардлагыг биелүүлэхгүй бол улс төрийн суулт хийж, НҮБ-д хандах болно. 

Иргэн н.Тунгалаг: Э.Магнайбаярт итгэл хүлээлгэсэндээ харамсаж байна. Залуу хүнд баймааргүй үйл явдал боллоо. Түүний гаргасан увиагүй явдлыг таслан зогсоож, цаашид ийм явдал битгий болоосой гэж хүсч мэдэгдэл хийж байна. 3700 сонгогчийн эрхийг зөрчсөн үйл явдал боллоо. 

Өмгөөлөгч н.Баттогтох "Аравдугаар сарын 15-нд орон нутгийн сонгууль болсон. Сонгуулийн дүн гарсны дараа МАН-д элссэн. Харин аравдугаар сарын 19-нд дүүргийн сонгуулийн хорооноос МАХН-аас нэр дэвшсэн Э.Магнайбаярыг төлөөлөгчөөр сонгогдсон тогтоол гарсан. Өөрөөр хэлбэл, төлөөлөгчөөр сонгогдсон тогтоол гарахаас өмнө өөр намд элссэн нь маргаан дагуулаад байгаа юм. Тиймээс иргэдийн төлөөлөл Захиргааны хэргийн шүүхэд хандсан" гэлээ. 

Б.Баатар