УИХ-ын ээлжит бус чуулганаар Эрүүл мэндийн даатгалын тухай, Эрүүл мэндийн тухай, эмнэлгийн тусламж үйлчилгээний тухай, эм, эмнэлгийн хэрэгслийн тухай хуулиудад нэмэлт өөрчлөлт оруулсан билээ. Энэхүү нэмэлт өөрчлөлтийн гол зорилго нь бизнес тоног төхөөрөмж биш хүнээ дагасан нэмэлт өөрчлөлтийг оруулж, 2020 оны арваннэгдүгээр сарын 1-нээс эмийн хөнгөлөлттэй холбоотой хуулиудыг хэрэгжүүлж эхлэхээр болсон юм.

Тухайлбал, жирэмсэн эх заавал харьяа биш дуртай эмнэлэгтээ очиж үйлчлүүлэх боломжтой болсноос гадна эрүүл мэндийн даатгал төлдөг л бол өөрийн дуртай эмч, эмнэлгээ сонгон үйлчлүүлэх боломжтой болсноороо онцлогтой юм.

Мөн иргэдийн эрүүл мэнд цаашлаад сар бүрийн эхэнд уртаас урт дараалал үүсгэж, ахмадуудыг чирэгдүүлдэг хөнгөлөлттэй эмийг худалдаалахад ихээхэн ахиц гарна гэсэн хүлээлттэй байгаа юм.

Харин өнөөдрөөс  буюу арваннэгдүгээр сарын 2-ны даваа гарагаас хөнгөлөлттэй эмийг худалдаалах шинэ журмыг хэрэгжүүлж эхэлсэн юм. Энэ дагуу эмийн сангууд  дурын эмчийн жороор  522 нэр төрлийн эмийг 30-70 хувь хөнгөлөлттэй үнээр олгож эхлэх юм. 

Арваннэгдүгээр сарын 2-ны буюу өнөөдөр өглөөний байдлаар, 13 дугаар хорооллын Бөхийн өргөө орчмын хэд хэдэн эмийн сангаар ортол өмнөх шигээ хөл дарсан дараалал алга. Эзэнгүй шахуу. Учрыг лавлавал, хэд хэдэн эмийн санч мөрөө хавчихаас тодорхой тайлбар хэлсэнгүй. 

Эмийн санд орж ирэх иргэдээс лавлавал, өрхийн эмнэлэг эмийн жор бичихгүй байна гэж байв. Энэ дагуу ойролцоох өрхийн эмнэлэг рүү орвол хөл гишгэх зайгүй дүүрэн хүн.

Хэрэгжүүлж эхлэх эхний өдрөөс л эмийн сан бус эсрэгээрээ өрхийн эмнэлэг ахмадуудаар дүүрчээ. Өрхийн эмчээс лавлавал, хурууны хээ унших төхөөрөмж ирээгүй. Мөн нэгтгэсэн мэдээлэл дутуу гэх тайлбар хэлж байх. 

Өмнө нь өрхийн эмнэлгүүд сарын сүүлчээс эхлэн эмийн жороо бичээд өгчихдөг байлаа. Харин энэ удаад хурууны  хээг авч санд бүртгэх учиртай аж. Энэхүү төхөөрөмжөө хүлээн цаг алдан суугаа нь энэ. Хоёрдугаарт, шинэ журам дүрмийг хэрэгжүүлэхтэй зэрэгцэн заавал нэг хүндрэл гардаг нь нууц биш. Энэ удаад ч давтагдаж буй нь энэ аж.

Ийнхүү хөнгөлөлтэй эмийг дурын эмчийн жороор олгоно. Дараалал үүсгэж, ахмадуудыг чирэгдүүлэхгүй гэсэн нь талаар болж, харин ч тэдгээрт хоёр ажил удчих шиг боллоо. Сарын эхэнд эмийн санд үүрийн гэгээнээс үдшийн бүрий хүртэл дугаарлан байж хөнгөлөлттэй эмийг авдаг байсан бол харин одоо өрхийн эмнэлэгтээ “түгжирч”, эмийн сангууд нь хоосон байна.

У.Тэргэл