Ерөнхий сайд асан, УИХ-ын гишүүн Сү.Батболд Оюутолгойтой холбоотой асуудлаар Иргэний шүүхэд дуудагдаж байгаа талаар эх сурвалжууд мэдээлсэн. Яг ямар асуудалд нэр холбогдсон нь одоогоор тодорхой бус байна.

Гэхдээ Сү.Батболд нь Оюутолгойн Хөрөнгө оруулалтын гэрээг байгуулагдах үед С.Баярын тэргүүлсэн Засгийн газрын Гадаад харилцааны сайд байсан. Уг гэрээг байгуулсны дараахан С.Баяр Ерөнхий сайд, МАН-ын даргын үүрэгт ажлаа Сү.Батболдод үлдээсэн.

Нэг үгээр хэлбэл, С.Баяр дээрх гэрээнд гарын үсэг зурсан нь үнэн боловч түүний дараа 2012 оныг хүртэл гэрээний хэрэгжилтийн эхний үе Сү.Батболдтой холбогдоно.

Түүнийг Ерөнхий сайд байхад УИХ-ын нэр бүхий гишүүд огцруулах асуудал тавьж байж Оюутолгойн гэрээний зарим зүйл заалтыг өөрчилж байсан гэдэг.

Мөн тухайн үеийн УИХ-ын дарга асан Д.Дэмбэрэл 2009 оны есдүгээр сард Оюутолгойн гэрээний төслийг УИХ-аар хэлэлцүүлэхдээ “Зэсийн үнийн өсөлтөнд ноодуулж байсан 68 хувийн ААНОАТ (Аж ахуйн нэгжийн орлогын албан татвар)-ын хууль хүчингүй боллоо. Иймд Засгийн газар 68 хувийн татварыг орлох АМНАТ-ын хуульд өөрчлөлт оруулах хуулийг яаралтай өргөн бариарай, үүнийг чинь Оюутолгойн гэрээнд тусгах нөхцөлтэйгээр гэрээний төслийг УИХ дэмжлээ шүү” гээд алхаа цохиж байсан бичлэг телевизүүдээр цацагдаж байсан юм. Ингээд Оюутолгойн гэрээний төсөл нь 2009 оны 9 сард УИХ-аар дээрх нөхцөлтэйгээр дэмжигдэж,  2010 оны дөрөвдүгээр сарын 5-аас хүчинтэй мөрдөгдөж эхлэхээр болсон. 

Сү.Батболд нь 2009 оны арваннэгдүгээр сард Ерөнхий сайд болж, 2010 оны дөрөвдүгээр сар болсон ч Засгийн газраас үнийн өсөлтийн 68 хувийн татварыг бага ч гэсэн орлох АМНАТ-ыг нэмэгдүүлэх хуулийн төслөө өргөн бариагүй өнгөрсөн.

Уг нь зах зээл дээр ашигт малтмалын үнэ өссөн нь ашиглалтын лиценз эзэмшигч компанийн үйл ажиллагаатай шууд холбоогүй тул тухайн улс авах татвараа тодорхой хэмжээгээр нэмэгдүүлдэг. Энэ нь олон улсын хэмжээнд нэгэнт тогтсон жишиг юм билээ. Гэвч манай улсад хэрэгжиж буй Оюутолгойн төсөл дээр ор тас хөдөлгөөнгүй болж хадагдан үлдсэн түүхтэй.

Энэ бол нэг асуудал.

Харин өдгөө иргэний шүүхэд очсон Сү.Батболд болон Оюутолгойтой холбоотой шуугиан тариад байгаа баримтад ямар ямар ноцтой зүйлүүд байгаа нь тун удахгүй ил болох биз ээ.

С.Сүлд