УИХ-ын гишүүн Х.Булгантуяагаас зарим зүйлийг тодрууллаа.

-Хүүхдийн хүчирхийлэлтэй холбоотой асуудал нийгмийн эмзэг сэдэв болж байна. Та эмэгтэй гишүүний хувьд хэрхэн ажиллая гэж бодож байна вэ?

-ТББ-уудтай хамтрач хүүхэд хамгаалах, эмэгтэйчүүдийн эрхийг хамгаалах, ажилгүйдлийг багасгах талаар сургалт семинар зохион байгуулна. Тухайлбал, “Ид шидийн орон” дээр явж байгаа үйл ажиллагааг тус байгууллагатай хамтарч тойрогтоо хэрэгжүүлнэ.

-Гишүүд аливаа үйл ажиллагаанд зарцуулах сахүүжилтээ ТББ, зөвлөхийнхөө нэрээр аваад байна?

-Энэ бол ашиг сонирхлын зөрчилтэй байхыг үгүйсгэхгүй.

-Энэ талаар хуульд тусгасан зүйл бий юу?

-Хуулиар ТББ-д санхүүжилт хийж болохгүй гэсэн заалт байхгүй. Эсрэгээрээ төрийн зарим нэг ажлыг ТББ болон мэргэжлийн байгууллагаар хийлгэх нь зүйтэй гэсэн бодлогыг барьдаг. ХНХЯ, Сангийн яам ч гэсэн нягтлан бодох бүртгэлийн стандартыг баталдаг. Сургалт, судалгааны хүрээлэнгээр дамжуулан сурталчилдаг.

Хүүхдийн хүчирхийлэл гэхэд энэ чиглэлийн үйл ажиллагаа явуулдаг нь ихэвчлэн төрийн бус байгууллага байдаг. Баянзүрх дүүргийн хувьд гэхэд гэмт хэрэг, хүүхдийн хүчирхийлэл хамгийн их үйлдэгддэг дүүргүүдийн нэг. Энэ чиглэлээр үйл ажиллагаа явуулдаг төрийн бус байгууллагыг сургалт, судалгаа хийж өгөөч, иргэдэд мэдээлэл өгөөч гэж хэлэхэд үүд хаалга нээлттэй байх ёстой. Харин улайм цайм ашиг сонирхлын зөрчил үүсэхийг үгүйсгэхгүй. Өөрийнх нь хамаарал бүхий этгээд байж болохгүй.

-Сүүлийн үед ТӨҮГ-тай холбоотой асуудал их яригдаж байна. Ялангуяа Эрдэнэт ТӨҮГ-т онц байдал тогтоосон гээд байдаг. Гэтэл онц байдал тогтоосон газар байгууллагын хөрөнгийг дарга нар дур зоргоороо ашиглах, захиран зарцуулах гарцыг бий болгоод өгчихсөн юм биш биз гэсэн асуулт гарч байна?

-Эрдэнэт үйлдвэрийн хувьд нэг авууштай зүйл нь жилээс жилд улсын төсөвт оруулж байгаа орлого нь нэмэгдэж байгаа. Нөгөөтээгүүр, орлого нь нэмэгдлээ гээд зардлаа нэмээд бай гэсэн үг биш. Төрийн өмчит компаниудын асуудал ялангуяа, 2021 оны төсвийг дагаж яригдаж байгаа том сэдэв болж байна. Төрийн өмчит компаниудын 60 гаруй хувь нь алдагдалтай ажилладаг. Төсөвт байгууллагуудын төсвийг хэмнээд л байдаг. Гэтэл 35 их наядын актив хөрөнгөтэй, улсын төсвөөс дэмжлэг авдаг байгууллагуудад тодорхой хэмжээгээр хяналт тавих нь зүйтэй байр суурийг гишүүдээс өгч байна. Би дэмжиж байгаа.

А.Сүх