Хүний эрхийн үндэсний төвийн таван орон тоо, тус комиссын эрүү шүүлтийн асуудал хариуцсан нэг оронд тоонд өрсөлдөгч нарыг сонгон шалгаруулах ажлын хэсэг хуралдсан. Хуралдаанаас ХЭҮК-ын гишүүнд нэрээ дэвшүүлсэн хүмүүсээс дөрвийнх нь нэрийг дэвшүүлэх боломжтой гэж үзэж, томилуулах саналтайгаар УИХ-ын Хууль зүйн байнгын хороонд хүргүүлэхээр болсон бол ХЭҮК-ын Эрүү шүүлтийн асуудал хариуцсан гишүүн П.Оюунчимэгийн нэрийг буцаажээ.

Төр түмэн нүдтэй гэдэг. Энэ удаад Хүний эрхийн үндэсний комиссын гишүүнээр 12 жил ажилласан. Энэ хугацаандаа сайнаас муугаар нь илүүтэй дуудуулах болсон П.Оюунчимэгийн нэрийг буцаасан нь нүдээ олсон шийдвэр гэлтэй. 

Тэгээд ч  түүний гишүүний бүрэн эрхийн хугацаа 2019 оны хоёрдугаар сарын 6-ны өдөр дууссан байдаг. Гэвч тэрбээр ханаж цадалгүй ХЭҮК-ын Эрүү шүүлтийн асуудал хариуцсан гишүүнд нэрээ дэвшүүлсэн ч хүлээн авсангүй.

Хүний эрхийн үндэсний комисс гэх энэ байгууллагад тэрбээр юу хийв. Сураг ажиг тавибал, хувийн амьдрал нь эрс дээшилж, хөрөнгө орлого нь жилээс жилд өсч,  тэрбумтан болсон түүхийг нь л салбарынхан төдийгүй нийгэм мэддэг болсон. Загнаж, зандарч тушаах дуртай түүний талаар сайнаасаа муугаар ярих нь их. П.Оюунчимэг гишүүний хөрөнгө, орлогыг авч үзье.

Тэрбээр нийтдээ нэг тэрбум 246 сая төгрөгөөр үнэлэгдэх хоёр орон сууц, үйлчилгээний дөрвөн оффистой.

159 сая төгрөгийн үнэ бүхий “Тоёота Ланд круйзер”-200, “Волксваген Тигуан” автомашинтай. 130 саяар үнэлэгдэх газар, 20 сая төгрөгийн үнэт эдлэл, “Жи би эс импекс” ХХК болон “ББХ” ХХК-ийг 100 хувь эзэмшдэг, “Оллоо” ХХК болон “Ремикон” ХХК-ийн хувьцаа эзэмшигч бөгөөд түүний хөрөнгө  гурван жилийн дотор ес дахин өсчээ. “Эрдэнэт” үйлдвэрт бараа шахсан л гэнэ, Баянгол дүүрэгт “Хабу” зочид буудалтай, дороо хүнсний дэлгүүр, ресторан, шөнийн цэнгээний газар, саунтай гэдэг.

Ингэтлээ хөрөнгөжсөн тэрбээр ХЭҮК гэх энэ байгууллагаас чаргууцалдаад байгаа нь ашиг сонирхол байгаа болоод тэр биз. Ямартай ч, П.Оюунчимэгийг хүлээж аваагүй нь түүнд хатуу санагдах ч бусдад бол төрийн шийдвэр нүдээ олсон хэрэг боллоо.

У.Тэргэл