Монголд царцсан барилга олон. Тэр дундаа хүүхдийн болон төрөх эмнэлэг, сургууль, цэцэрлэгийн барилгууд хөрөнгө, мөнгөгүйгээс болоод замын дунд царцсан нь их. Шаардлагатай хөрөнгийг нь төсөвт суулгуулах гэдэгт ч даажигнасан мэт хэдхэн хувийг нь өгсөн болоод орхидгоос барилгаа дуусгаж чадалгүй он удаан жилийг үдэх нь бий. Гэтэл манай улсад сүр хүч, хөрөнгө мөнгө, ажиллах хүчээрээ ч  баавартай нэгэн салбар бий.

Энэ нь хуулийн салбар юм. Хэдхэн хоногийн өмнө “Уучлахгүй” хөдөлгөөнийхөн ХЗДХЯ-ны байраар зочилж, тансаг орд харш мэт тус яамны байрыг нийтэд дэлгэсэн.

Тодруулбал, тус яамны Төрийн нарийн бичгийн дарга гэхэд л 700 гаруй саяар түүний дотор 626 саяын тансаг загварын тавилгаар өрөөгөө тохижуулж, 71,5 саяар хөшиг худалдан авсан бол яамныхан нь  хурлын нэг танхимыг 117,9 сая төгрөгөөр тохижуулсан байх жишээтэй.

Хамгийн өнгөлөг, хөрөнгөлөг, мөнгөлөг яваа нь яалт ч үгүй ХЗДХЯ-ны салбар байгууллагууд юм.

Өндөр өндөр шилэн барилгууд хэдхэн сарын дотор сүндэрлэж, олны нүдийг булааж, нийслэлийг чимэх болсон. Тухайлбал,

-Сүхбаатар дүүргийн цагдаагийн нэгдүгээр хэлтсийн зургаан давхар барилгын шавыг  2019 оны зургаадугаар сард тавьсан ч 2019 оны арванхоёрдугаар сард  буюу ердөө зургаахан сарын дотор ашиглалтад оруулсан байдаг.

-ЦЕГ-ын Мөрдөн байцаах газрын шинэ байрны шавыг 2018 оны дөрөвдүгээр сард тавьж, тухайн ондоо буюу 2018 оны арванхоёрдугаар сард хүлээлгэн өгчээ. Ердөө наймхан сарын дотор есөн давхар шил, толь болсон барилгыг барьжээ.

-ХЗДХЯ-ны шинэ байрны шавыг 2018 онд тавьж байсан ба 2019 оны арванхоёрдугаар сарын 25-ны өдөр тууз хайчилж, хүлээн авах үйл явцыг чимээгүйхэн хийсэн байдаг. Энэхүү байрны нийт санхүүжилт 30 орчим тэрбум гэдэг албан бус мэдээлэл бий. 

Хууль хүчний байгууллагуудын орон байрыг шинэчилж буйг буруутгах гэсэнгүй. Төр нь нийгмийн ялгаа гаргаж буйг л сануулах гэсэн хэрэг юм. Сургууль, цэцэрлэг барих төсвийг тусгасан нэртэй, тэр нь нийт хүссэн санхүүжилтийн ердөө ганцхан хувь ч байх жишээтэй. Төр нь ийнхүү даажигнаж байхад хууль хүчний байгууллагууд олон давхар шилэн гоёмсог барилгыг богинхон хугацаанд барьж, ашиглалтад оруулж байгаагаас харахад ийм боломж бийг харуулж байна. Хотын төвд сүндэрлэх шил, толь болсон барилгууд хууль хүчний байгууллагынх гэхэд иргэд эргэлздэг ч нийслэлд өнгө нэмж буй нь олзуурхууштай.

У.Тэргэл