Харааны бэрхшээлтэй хүүхдүүдийн 116 дугаар сургуулийн багш, ажилтнууд өнөөдөр БШУ-ын яамны өмнө эсэргүүцлийн цуглаан зохион байгууллаа. Энэ үеэр сургуулийн багш ажилчдын 80 гаруй хувь нь ажил хаяж, 25 багш ажилчид өлсгөлөн зарлаж, суулт хийнэ гэдгээ мэдэгдэв. 

Тус сургуулийн Үйлдвэрчний хороон дарга н.Халиун "Манай сургуулийн хоёр багшийг ажлаас халсан. 116 дугаар сургуулийн захирлыг томилохдоо туршлагатай боловсон хүчнийг томилоогүй. Сүүлийн таван жилд есөн захирал солигдсон нь сургуулийн үйл ажиллагаа доголдох,  багш сурагчдын эрх зөрчигдах зэрэг сөрөг үр дагаварууд гарсаар байна. Биднийг санал суудлын төлөө тэмцэж байгаа мэт ойлготыг нийгэмд төрүүлж байгаа ч үнэндээ сургуулийн үйл ажиллагаа доголдож байгаа учраас бид дотоод асуудлаа ил гаргаж тэмцэхээс өөр аргагүй болсон" гэв. 

Багш ажилчдын төлөөлөл "Д.Мөнхбаатар нь хэсэг бүлэг хүмүүсийн захиалгаар манай сургуульд ирж ажиллаж байна. БШУЯ манай сургуулийн онцлогийг үл хайхран энэ хүнийг сонгосонд харамсаж байна. Уг нь сайд Л.Цэдэвсүрэн манай сургуулийн асуудлыг шийдэж өгнө гэж хэлээд Д.Мөнхбаатарыг хүлээж авахыг хүссэн. Гэтэл яамнаас зөвлөн туслах баг ажиллана хэмээчихээд дараа нь ажлын хэсгийн дүгнэлт гэх зүйлээр энгийн багш нарыг нухчих дарж, хэлмэгдүүлж байна. Үүгээр ч зогсохгүй Д.Мөнхбаатарыг сонгон шалгаруултад тэнцсэн гэж биднийг басамжилж, нийгэмд худал мэдээлэл түгээж байна. Мөн харааны бэрхшээлтэй багшийг ална хэмээн сүрдүүлсэн. Үүгээр ч зогсохгүй Д.Мөнхбаатар хоёр багшийг ажлаас нь халж, сурагчдын эрх ашгийг зөрчиж байна. Л.Цэдэвсүрэн биднийг дарамталж байгаа учраас У.Хүрэлсүх сайд бидний асуудлыг анхааралдаа хандах хэрэгтэй байна" хэмээлээ.

Багш ажилчид Д.Мөнхбаатар аа албан тушаалын төлөө хоморгон халахаа зогсоо, энгийн багш нарыг хохироохоо боль, хамт олныг хохироохоо зогсоо, сонгон шалгаруулалт шударга бус байсан, Л.Цэдэвсүрэн сайдаа бидэнд тайван ажиллах боломж олго гэгчлэнгийн уриа лоозон барьж жагссан юм. 

Б.Баатар