Баянгол дүүргийн АН-ын төлөөлөгчид хуульд зааснаар анхдугаар хурлаа явуулахгүй байгаа талаар дүүргийн төлөөлөгчид мэдээлэл хийлээ.

Баянгол дүүргийн 11 дүгээр хорооноос сонгогдсон Ү.Амартүвшин “Миний талаар дүүргийн Засаг дарга болон нэр бүхий хүмүүс нэгэн сайтаар дамжуулан гүтгэлэг бүхий мэдээллийг тараалаа. Өчигдөр дүүргийн ИТХ-ын анхдугаар хуралдаан эхэлсэн. Энд АН-аас сонгогдсон Г.Нарангэрэл төлөөлөгч хурал даргалж эхлүүлэнгүүтээ завсарлага авсан.

Эндээс юу харж болох вэ гэвэл ерөөсөө Баянгол дүүргийн ИТХ-ыг хуралдуулахгүй байх, ямар нэгэн аргаар АН-ын удирдлагууд, эзэн суусан хүмүүс сонгогчдынхоо саналыг уландаа гишгэж, эрх мэдлээ өгөхгүй гэсэн ийм зүйл явж байна.

Хууль бусаар дүүрэгт АН-ын засаглалаа авч үлдэх гэж, С.Эрдэнийн өмч мэт иргэдийн сонголтыг уландаа гишгэж байна. Энэ дүүрэгт хууль хэрэгжих ёстой. Гацаах зорилгоор төлөөлөгчдийг гүтгэж доромжилж байна.

Анхдугаар хуралдаанаар дүүргийн Иргэдийн төлөөлөгчдийн бүрэн эрхийг батлах ёстой байсан. Гэвч хурал даргалагч Г.Нарангэрэл хууль бус завсарлага авсан юм. Хэрэв хурал даргалагч завсарлага авах бол хуулиар тогтоосон хугацааг хэтрүүлэхгүйгээр завсарлага авна гэж заасныг зөрчиж байна.

Орон нутгийн сонгуулиас хойш 20 хоногийн дотор анхдугаар хуралдаанаа хийж, Иргэдийн төлөөлөгчдөө батлах ёстой. Гэтэл хуульд заасан энэ хугацааг зөрчиж, завсарлага авч, өнөөдөр 12.00 цаг хүртэл хойшлуулсан ч, дахин хойшлуулах арга зам хайж байна. Хууль бус эрх мэдлээ хадгалахыг оролдож байна” гэлээ.

А.Сүх