Монгол Улсын Ерөнхийлөгч Х.Баттулга бүрэн эрхийнхээ хугацаанд юу хийж амжуулав. Ерөнхийлөгч маань 21 аймгийг тойрч иргэдтэй уулзан санал бодлыг нь сонсонгоо “Алдарт эх”-ийн одонг олон хүүхэд төрүүлж өсгөж, хүмүүжүүлсэн элбэрэлт ээжүүдэд “харамгүй” тараав. Энэ жилийн хувьд Монгол Улсын Ерөнхийлөгчийн зарлигаар “Эхийн алдар” монголчуудын ярьж заншсанаар “Алдарт эх”-ийн 1,2 одонг улсын хэмжээнд  нийт 10677 ээжид олгожээ.

Тухайлбал, Увс аймагт 346, Сэлэнгэд 382, Ховдод 66, Дорноговьд 203, Сүхбаатарт 214, Дорнодод 308, Хөвсгөлд 531, Төв, Говьсүмбэрт 486, Налайх, Багахангай, Багануурт 837, нийслэлээс Баянзүрх дүүрэгт 1021, Сүхбаатар дүүрэгт 409, Сонгинохайрхан дүүрэгт 1071 эхэд олгосон байна.

Өмнө нь аймаг, сумынх нь Засаг дарга л зүүж өгдөг байсан уг одонг Төрийн тэргүүнээсээ гардана гэдэг ээжүүдэд ихээхэн завшаан юм. Хаа холын аймаг, сумдад очин өөрийн биеэр одонг энгэрт нь зүүж өгч байсан Ерөнхийлөгч түүхэнд үгүй. Харин анхдагч нь Х.Баттулга болж байна.

Дараагийн нэг ажил нь Төрийн тэргүүн маань Улсын ерөнхий прокурорын газарт гэнэт зочилж, “60 тэрбум”-ын гэх хэргийг яаралтай шалгах үүргийг Ерөнхий прокурорт нь хамт олных нь өмнө өгч байлаа.

Хамгийн том  ажил нь хөрш БНХАУ-д коронавирусний халдвар  ид тархаж байсан хүнд үед айлчлахдаа 30 мянган хонь бэлэглэсэн нь өдгөө дуутай болтлоо хүчээ авчээ. Ингээд бодоход Х.Баттулга ирэх онд болох Монгол Улсын Ерөнхийлөгчийн сонгуульд хүч үзэхэд алзахгүй боллоо. Түүнийг Монголын мянга мянган алдарт эхчүүд, төрийн тэргүүнийхээ хишгийг хүртсэн эрхмүүд дэмжих нь дамжиггүй. Харин Ерөнхийлөгч маань өнгөрсөн дөрвөн жилд хийж, бүтээснийхээ үр дүнг үзэх нь зайлшгүй.

У.Тэргэл