УИХ-ын өнөөдрийн чуулганаар ХЭҮК-ийн гишүүдийг томилох эсэх асуудлыг хэлэлцэж байна. Хууль зүйн байнгын хорооноос Ж.Хунан, Б.Энхболд, Х.Мөнхзул, Г.Нарантуяа, Д.Сүнжид нарын таван хүнийг томилохыг дэмжсэн билээ.
Ингээд УИХ-ын гишүүд нэр дэвшигчдээс үг асууж, хариулт авлаа.
Б.Баярсайхан: ХЭҮК-ын үйл ажиллагаа олон нийтэд тэр бүр нээлттэй байдаггүй. Үйл ажиллагаа нь тодорхой биш байдаг. Та бүхэн улстөрийн харьяалалгүй нам бус гэж орж ирж байна. Гэхдээ ямар нэгэн нөлөөлөл бий юу. Хоёрдугаарт, хуульчийнхаа шаардлагыг хангаад орж ирсэн юм байна. Хүний эрхийн төлөө явах нь миний хобби гэж хэлж чадах уу. Гуравдугаарт, төрийн өндөрлөг, гишүүдэд үгүй гэж хэлж чадах зориг байна уу?
Ж.Хунан: Миний ард улстөрийн ямар нэгэн эвсэл, нам байхгүй. Хуульчиын гэр бүлд өсөж, өндийсөн учраас энэ мэргэжлийн төлөө зүтгэнэ. Та сэтгэл зүрхтэй юу гэж асуулаа. Хүний эрхийн чиглэлээр анхнаасаа ажилласан. Дээдэлсэн, хамгаалсан чиглэлээр өөрийн бүх зүйлээ дайчлан ажилласан гэж бодож байгаа. Мөн үнэ төлбөргүй хууль зүйн зөвлөгөө үзүүлэх эхлэлийг тавьж байсан. Эрх зүйн хөтчийн тогтолцоо бий болгоход онцгойлон анхаарч ажилласан.
Улстөрчдийн эсрэг зоригтой байж чадах уу гэсэн. Би байж чадна. Цаашид ч энэ зарчмаа баримталж ажиллана.
Д.Сүнжид: Улстөрийн намын харьяаллаар ажиллаж байгаагүй. Хүний эрхийн чиглэлээр сургалтыг 22 жилийн хугацаанд янз бүрийн түвшинд хийж ирсэн. Энэ бүхэндээ Үндсэн хуульд заасан хүний эрхийг хамгаалах талаар холбогдуулж ярьдаг.
Х.Мөнхзул: ХЭҮК хүний эрхийг хамгаалах чиг үүрэгтэй байгууллага. Өнгөрсөн хугацаанд хуулийн чиг хүрээнд хангалттай ажилласан гэж үзэж байна. ХЭҮК-ын гишүүн шаардлага, зөвлөмж гаргадаг.
Миний бие хүний эрхийн чиглэлээр 22 жил ажилласан. Энэ чиглэлээр ажиллах сэтгэл зүрх байгаа учраас өдий хүртэл явж ирлээ. Миний ард ямар нэгэн намын харьяалал байхгүй. Хүний эрхийн талаар түргэн шуурхай, хариу үйлдлэл үзүүлнэ гэдэгт итгэлтэй байна. Надад ийм зориг зүрх бий.
Б.Энхболд: Надад улстөрийн харьяалал, хамаарал байхгүй. Багшлах ажлыг өнгөрсөн хугацаанд тогтвортой хийж ирсэн. Үүнээс гадна эрдэм шинжилгээ, судалгааны ажлыг хүний эрхийн чиглэлээр хийж ирсэн. Хүний эрхийг хамгаалах чиглэлээр өөрийн байр суурь, хамт ажиллагсдын итгэл үнэмшлийг сонсож, зориг гаргаж ажиллаж чадна.
Г.Нарантуяа: Намын нөлөөлөл байхгүй. 2012 оноос хойш эх орондоо байсангүй. Олон улсын чиглэлд ажиллаж ирсэн учраас намын харьяалал байхгүй. Одоогийн байдлаар Австралийн үндэсний их сургуульд судлаач, Германы зөвлөх үйлчилгээний фермээр дамжуулан Европын холбоонд зөвлөх зэргээр ажилладаг. ХЭҮК-ын гишүүнээр ажилласнаар ахуй нөхцөл, цалин орлого хэд дахин багасах боловч өнөөдрийг хүртэл тодорхой хугацаанд юм сурсан бол эх орондоо зориулах цаг нь болсон гэж үзэж байна. Тиймээс цэвэр сэтгэл зүрхний сонголт юм. Мөн мэдээж зориг зүрх гаргах болно. Хамтарч ажиллана гэж итгэж байгаа.
А.Сүх
