Хөгжлийн бэрхшээлтэй иргэдийн асуудал хаалганы гадна үлдэж, тэд адлагдсаар, буруутан болсоор байх уу. Харааны бэрхшээлтэй хүүхдүүдийн сурдаг 116 дугаар сургуулийн захирал сүүлийн зургаан жилийн хугацаанд 9 удаа солигджээ. Үүний гол буруутан нь багш ажилчид гэнэ. Нийгэмд хэдийнэ ийм мэдээлэл түгж, эрхээ хамгаалсан багш ажилчид буруутан болж эхэллээ.
Угтаа тэдэнд төдийгүй сурагчдын сурч боловсрох эрхээ эдлэхэд нь асуудал гарсан учраас л тэмцэж, аргаа барахдаа өлсгөлөн хүртэл зарлаж байх шиг.
116 дугаар сургуулийн багш, ажилчид сургуулийн захирал Д.Мөнхбаатарыг хараагүйчүүдийн сургуулийн нөхцөл байдлыг мэдэрч ажиллаж чадахгүй, багш ажилчдад дарамт учруулж, сурагчдын сурч боловсрох эрхэнд халдаж байна хэмээн үзэж, ажлаас нь чөлөөлөхийг шаардаж буй. Энэ тэмцэл өнгөрсөн есдүгээр сард өрнөж, тэд өлсгөлөн хүртэл зарлаад амжсан. Гэсэн ч багш ажилчид сайдынхаа үгэнд орж ажлаа үргэлжлүүлэхээр болоод байсан юм. Нөхцөл байдал нааштай эргэнэ хэмээн мөрөөдөж байсан багш ажилчдын итгэл талаар болсон учир тэд дахин тэмцэхээр болсон нь энэ.
Ийнхүү өгүүлэхийн учир нь захирал Д.Мөнхбаатар нь алдаа оноогоо ухамсарлахын оронд бурууг нь хэлж, тэмцэж байсан хараагүйчүүдийн сургуулийн хоёр багшийг ажлаас халж, багш ажилчдад улам дарамт үзүүлэх болсон гэх. Тиймээс дахин тэмцэж, захирлаа ажлаас нь чөлөөлүүлж өгөхийг хүсчээ.
БШУ-ны яамны мэдээлж буйгаар хараагүйчүүдийн сургуулийн захиралд томилогдох хүсэлтэй сонгон шалгаруулалтад орох хүн олддоггүй байна. Харин Д.Мөнхбаатар захиралд ямар нэгэн алдаа эндэгдэл байхгүй. Зөвхөн багш ажилчид л тэмцэл хийж, захирлаа солихыг хүсч байна гэх.
Буруу зөв нь хэндээ байгааг шүүн тунгаах нь хүн бүрийн эрх.
Манай улсад хөгжлийн бэрхшээлтэй иргэдийн асуудал хаалганы гадна үлдэж, тэдний дуу хоолой цуурай болон замхраад байна уу гэх хардлага, халаглал төрөх болсныг нуух юун.
Хэдхэн жилийн өмнө сонсголын бэрхшээлтэй хүүхдүүдийн 29 дүгээр сургуулийн захирал багш, сурагчдадаа “бэлэг”-ийн дарамт үзүүлж байсан гэдгийг өнөөдөр ч олон нийт мартаагүй байгаа.
Тиймээс нийгэмд цөөнх болсон хөгжлийн бэрхшээлтэй иргэдийнхээ асуудлыг төр засаг, салбарын яамдууд нь анхааралдаа авахгүй бол хүний эрх, эрх чөлөө зөрчигдсөөр байх нь.
Б.Баатар
