УИХ-ын гишүүн С.Чинзоригоос зарим зүйлийг тодрууллаа.

-Халамж хавтгайрч байгаа талаар сөрөг намаас хүчтэй шүүмжилж байна. Мөн өнгөрсөн өдрүүдэд гарсан үйл явдал харуулж байна л даа. Халамжийн хавтгайрлыг яаж бууруулах вэ?

-Жишээ нь, нийслэлд амьжиргааны түвшин 230 мянган төгрөг. Гэтэл халамжийн сангаас олгож байгаа халамжжийн тэтгэвэр 188 мянга. Амьжиргааны түвшнээс доогуур хэмжээний тэтгэвэр, тэтгэмж өгчихөөд халамж хавтгайрч байна гэж хэлж болохгүй. Нөгөө талаас халамжийн зардал гэдэг хүн бүрд очих ёстой. Хуулиар тогтоочихсон зардал байдаг учраас хэмнэх боломж байдаггүй.

-Халамжийн сангаас 26 тэрбумыг хассан байсан?

-26 тэрбум багасч байгаа нь хүнд очиж байгаа тэтгэвэр, тэтгэмжийн хэмжээг танаж байгаа зүйл биш. Зарим нэг давхардлыг арилгах хүрээнд уг мөнгийг хасахыг дэмжих нь зөв гэж үзсэн. Ялангуяа, Эрүүл мэндийн даатгалын шимтгэлийг төр хариуцдаг иргэд, халамжийн сангаас  протез, ортопедын  үйлчилгээ авдаг. Нөгөө талд Эрүүл мэндийн даатгалын шимтгэл төлөгчид гэдгээрээ Эрүүл мэндийн даатгалын сангаас протез, ортопедын хөнгөлөлт авдаг. Хоёр талд ийм давхардал байгаа учраас Халамжийн сангаас протез, ортопедын үйлчилгээг болиулсан. Түүнээс биш халамжийн хамрах хүрээг нь хумих эсвэл нэг хүнд ногдох хэмжээг нь танаж байгаа зүйл биш юм.

-Ирэх оны төсвийн төслийг хоёр дахь хэлэлцүүлгийг хийсэн. Та төсвийн ажлын хэсэгт багтсан. Тэвчиж болох зардлуудаа хэр танав. Ямар өөрчлөлт орсон бэ?

-2021 оны төсвийн төсөлд судалгаа хийж, санал дүгнэлт хийх ажлын хэсэг ажилласан. Ажлын хэсэг тэвчиж болох зардлуудыг танах чиглэлээр ажилласан. Энэ хүрээнд 64 орчим тэрбумыг тэвчиж болох зардал гэж хасаж байгаа. Тухайлбал, гадаад дотоод томилолтын мөнгө, онцгой, цагдаа, эрүүл мэндийн салбараас бусад салбарын унааны зардлуудыг хассан. Төсвийн алдагдлыг бууруулахад энэ таналт бага ч гэсэн эерэгээр нөлөөлөх байх. Хоёрдугаарт, зураг төсөлгүй байгаа зарим хөрөнгө оруулалтыг хасах, төсөвт өртөг нь нэмэгдсэн олон хөрөнгө оруулалтыг танах чиглэлээр ажлын хэсэг ажилласан.

-Хөрөнгө оруулалтаас хэд орчим төгрөг танагдсан гэсэн үг вэ?

-Урсгал зардлаас 64 орчим тэрбумын зардал хасаж байгаа. Зарим хөрөнгө оруулалттай холбоотой ялангуяа, гишүүдийн тойрогт хуваарилагдсан зардал тэгш бус байна гэсэн асуудал яригдсан. Энэ хүрээнд Дундговь аймагт гэхэд 2021 онд шинээр санхүүжүүлж эхлэх зардлыг 27 тэрбумаар танасан. Энэ мэтчилэн хөрөнгө оруулалт дээр тэвчиж болох зардлын таналт, хасалт хийгдсэн.

Б.Лхам