“Ковид-19” цар тахлыг дотооддоо алдахгүйн тулд төр, засаг болоод иргэн бүр хичээж байгаа ч тохиолдлын тоо өдрөөс өдөрт нэмэгдэж байгаад иргэд айдас, хүйдэстэй байгаа. Тэгвэл коронавирусний халдварын эрсдэлээс хэрхэн урьдчилан сэргийлэх вэ. Үймж, санаа зовнихоос илүүтэй гараа сайтар угаан, амны хаалтаа зүүж, амаа зайлж байхыг албаныхан сануулсаар ирсэн. Мөрдвөл мэдээж эрсдэл бага.

Харин коронавирусний халдварын шинж тэмдэг илэрсэн, сэжигтэй санагдсан, мөн тусгаарлалтад 21 хоног байгаад гарч ирсэн ч халдварын эрсдэл бүрмөсөн үгүй болсныг бататгах гэсэн иргэд шинжилгээ өгөхийг хүсвэл яах вэ.

Энэ тохиолдолд коронавирусний шинжилгээг ХӨСҮТ-д өгч болно. Гэхдээ  150 мянган төгрөгийн үнэтэй. Мэдээж, эрсдэлээс сэргийлж байвал 150 мянган төгрөг их мөнгө биш ч жирийн иргэний хувьд чамгүй өндөр санагдана. Өнөөдрийн байдлаар, энэ шинжилгээг хэчнээн хүн өгснийг ХӨСҮТ-ийнхнөөс асуумаар санагдлаа. Мэдээж, үнийг таамгаар тогтоогоогүй нь лавтай. Оношлуур болоод бусад зүйлсийг гаднаас  үнэтэй авдаг учраас өртөг өндөр байж болно. Гэхдээ энэ үнээр сайн дураар шинжилгээ өгье гэх хүн хэд байгаа бол...

Өнгөрсөн хугацаанд дэлхий нийтийг түгшээсэн цар тахлыг эрсдэлгүйгээр даван туулахад Монголын хувь иргэн болоод компани, аж ахуйн нэгж, байгууллагаас 1,6 их наяд төгрөгийн  хандив өргөсөн  байдаг.

Энэ мөнгийг юунд хэрхэн зарцуулсан талаарх тайланг иргэд нэхсээр буй. Энэ мөнгөнөөсөө хүссэн иргэдийг, урьдчилан сэргийлэхийг хүссэн нэгний мөнгийг төлж яагаад болохгүй гэж. Үүнээс л сэргийлээрэй гэж хандивын мөнгийг урлаг соёлынхон маань, нийгмийн хариуцлагаа ухамсарласан аж ахуйн нэгж, байгууллага, хувь иргэд  маань хандив өргөсөн гэж ойлгодог.

“Ковид-19”-ийн цар тахлаас, халдвараас сэргийлэхийн тулд хандивын мөнгөөрөө шинжилгээний төлбөрийг бүрмөсөн төлдөггүй юм гэхэд тодорхой хэмжээгээр хөнгөлж болдоггүй юм уу.

Гадаадын олон улс иргэддээ шинжилгээг үнэгүй өгөөч гээд “гуйгаад” байхад манайх л гэж өндөр үнэ тогтоочихоод суугаа нь хэр зохистой вэ. “Ковид-19”-ийн  халдвараас сэргийлэхийн тулд шинжилгээг үнэгүй болгох, эрсдэлээс сэргийлж, олон хүнийг хамруулах нь цар тахлын энэ хүнд цагт төр, засгийн барих гол бодлого энэ байх ёстой санагдана.

У.Тэргэл