Сэлэнгэ аймгийн Онцгой комиссоос цаг үеийн асуудлаар мэдээлэл хийж байна.

Тус аймгийн Засаг дарга Ш.Оргил "Сэлэнгэ аймагт 1239 шинжилгээ хийснээс 58 тохиолдол бүртгэгдэж, ХӨСҮТ-д хүргүүлсэн. Тус аймагт нөхцөл байдал хүнд байгаа хэдий ч Монгол Улсаа хүнсээр хангахын тулд Сүхбаатар боомтын төмөр замаар хүнс, нэн шаардлагатай бараа бүтээгдэхүүнийг татан авах ажил үргэлжилж байна. Харин автомашиныг хөдөлгөөн бүрэн зогсоосон.

Сүхбаатар сумын болон хилийн боомт дахь Алтанбулаг сумын нийт хүн амыг түргэвчилсэн оношлуулаар оношлох ажлыг эхлүүлэн дөрөвдэх өдрөө үргэлжилж байна.  Мөн Цагдаа, Онцгой, Гааль, Цэргийн ангиуд, Төмөр замд ажиллаж байгаа нийт  албан хаагчдыг эрт илрүүлгийн оношилгоонд хамруулж байна.  Иргэдэд эрүүл мэндийн зөвлөмж өгөх тусгай дугаарын утсуудыг 24 цагаар ажиллуулж байна.

Сүхбаатар суманд эмийн сангийн хүргэлтийн үйлчилгээг хувийн хэвшлийн 2 эмийн сангаар дамжуулан 24 цагаар үйлчилж байна.

Сүхбаатар сумын ундны ус түгээх худгуудаас гэр хорооллын иргэд үнэ төлбөргүй усаа авах зохицуулалтыг хийлээ. Аймгийн төвийн хэмжээнд түлээ, нүүрсийг захиалгын дагуу хүргэлтээр хүргэх үйлчилгээг өчигдрөөс эхлүүлсэн.  

Аймгийн 17 сум, 6 тосгоны хүнсний нөөцийг бүрдүүлэх, хангамжийг тасалдуулахгүй байх, аймгийн хэмжээнд өрнүүлж буй “Идэш” арга хэмжээг сум сумандаа хэрхэн зохион байгуулах тухай 17 сумын Онцгой комисстой цахимаар холбогдож,  чиглэлийг өгсөн.

Аймгийн хэмжээнд хөдөлгөөний хязгаарлалт тогтоосон 31 хяналтын цэг, Сүхбаатар сумаас орж, гарах тээврийн хэрэгслийн хөдөлгөөнд хяналт тавих 15 цэг, хөдөлгөөнт эргүүлийн 53 чиглэл, гэрийн тусгаарлалтын хамгаалтад нийт 409 албан хаагч ажиллаж  байна. Эрт илрүүлгийн онош нь эцсийн шийдвэр биш бөгөөд тухайн иргэний биед ямар нэгэн вирус байгаа эсэхийг үзэж буй юм. Энэ нь коронавирус илэрсэн гэсэн үг биш тул түргэн оношлуурын шинжилгээний хариуг сонссон иргэд айж сандрахгүй байх хэрэгтэй. Алтанбулаг боомтын үйл ажиллагааг зогсоосон. 

Сүхбаатар сумын 8 багийн 9 цэгт иргэдээс сайн дурын шинжилгээ өгөх ажлыг зохион байгуулж байна.  Шинжилгээ авах үйл ажиллагаа үргэлжилж байгаа тул шинжилгээнд хамрагдаагүй иргэд гэрийнхээ ойрын шинжилгээ авах цэгт очиж шинжилгээгээ өгөх нь иргэний үүрэг.