Монгол Улс анх удаа гамшгийн бэлэн байдлын зэрэгт шилжиж, хатуу хөл хорионд ороод байгаа билээ. Энэ хугацаанд Улаанбаатар болон хөдөө орон нутагт гацсан иргэдийг маргаашаас буюу арванхоёрдугаар сарын 1-нээс нутаг буцаахаар болсон билээ.

Үүнтэй холбоотойгоор нутаг буцах иргэд шинжилгээ өгөх газруудад дараалал үүсгэн, хэл ам татлах болов. УОК-ын мэдээлснээр нутаг буцах иргэд 119.mn сайтад хандаж, шинжилгээний цагаа авч, үйлчлүүлэх учиртай байсан. Гэвч ёсоор болсонгүй. 

Нийслэлийн хэмжээнд хөдөө орон нутаг руу явах иргэдээс шинжилгээ авах 20 цэгийг нэмж гаргасан ч иргэд нэг газарт хэт олноороо цуглаж, дараалал үүсгэн, шуугиан тарьсан явдал нь олон нийтийн шүүмжлэлийг дагуулав.

Эрүүл мэндийн яамнаас хүн хоорондын зайг 1.5-2 метр байх ёстой гэдгийг олонтой хэлж, сануулж буй. Гэтэл монголчууд хэнэггүй гэх зангаараа түрүү барьж, халдвар хамгааллын дэглэм зөрчсөөр байгаа юм. 

Түүнчлэн эл ажлыг буюу хөл хорионд гацсан иргэдийг нутаг буцаах ажлыг зохион байгуулах учиртай ажлын хэсэг ажлаа туйлын хангалтгүй эхлүүлэв.

Тодотговол, Засгийн газраас Улаанбаатар хот болон хөдөө орон нутагт гацсан иргэдийг нутаг буцаах ажлыг зохион байгуулах ажлын хэсгийг байгуулсан. ЗТХЯ-ны Төрийн нарийн бичгийн дарга С.Батболдоор ахлуулсан ажлын хэсэгт ХЗДХЯ, ЭМЯ, ХХАХХҮЯ-ны төрийн нарийн бичгийн дарга нар багтаж, хамтран зохион байгуулах учиртай. Гэтэл тус ажлын хэсгийн эхний ажил болох иргэдийг шинжилгээнд хамруулах ажил ийнхүү хэл амтай эхлэв.

Ажлын хэсэг цаашид энэ байдлаа давтахгүйгээр нарийн зохион байгуулалтад орж, халдвар хамгааллын дэглэмийг сахиж ажиллахгүй бол 21 аймагт коронавирусний халдвар алдах магадлалтай гэдгийг хэлэх хүн олон байна.

Түүнчлэн маргаашаас орон нутгийн иргэд товчоодоор гарах, арванхоёрдугаар сарын 7-оос оюутан сурагчдыг шинжилгээнд хамруулж, нутаг буцаах, орон нутагт очоод халдвар хамгааллын дэглэм баримтлуулах, дахин шинжилгээнд хамруулах зэрэг олон ажил хүлээгдэж буй.

Гамшгийн бэлэн байдлын зэрэгт шилжсэн эдгээр өдрүүдэд Засгийн газраас үүрэг даалгавар авсан эрхмүүд ажлаа үр дүнтэй нарийн зохион байгуулж гэмээнэ коронавирусний халдвар улсын хэмжээнд тархахгүй байх боломжтой юм. Мөн иргэд “Би өвдвөл, чи өвдөнө, чи өвдвөл бид өвдөнө” гэдгийг сайтар ухамсарлаж, хувийн ариун цэвэр, халдвар хамгааллын дэглэмээ баримтлах шаардлагатай байгаа юм.

Б.Баатар