Улаанбаатар хот руу ирэх болон орон нутаг руу гарах иргэдийг өнөөдрөөс буюу арванхоёрдугаар сарын нэгнээс 10-ны хооронд зорчих хөдөлгөөнийг зохион байгуулахаар болсон билээ. Одоогоор 100 мянга орчим иргэн орон нутаг болон нийслэлд шилжилт хөдөлгөөн хийнэ гэсэн судалгаа гарсан.

Гамшгийн бэлэн байдал зарлаж, хатуу хөл хорио тогтоосон эл үед иргэдийн хөдөлгөөнийг нээх нь эрсдэл ихтэй ч төр засаг иргэдийнхээ ахуй амьдралыг бодолцоод ийнхүү хөдөлгөөнийг нээхээр болсон. 

Ингэхдээ иргэн бүрийг PCR-ийн шинжилгээнд хамруулж, нийтийн тээврийн хэрэгслээр зорчих иргэдийг тээвэрлэх ажлыг хүртэл нарийн зохион байгуулж, түр журам хүртэл боловсруулаад байгаа. 

Энэ нь коронавирусний халдварын голомтыг 21 аймагт тархаахгүй гэсэн ганцхан зорилготой. Энэхүү зорилго төр засгийн төдийгүй түмэн олны зорилго байх учиртай гэдгийг иргэн бүр ухамсарлаж, халдвар хамгааллын дэглэмээ сайтар баримтлах нь юу юунаас илүү чухал болоод байна.

Коронавирусний халдварын нууц үе 7-14 хоног, цаашлаад 21 хоног хүртэл үргэлжилдэг болохыг мэргэжлийн хүмүүс хэлж, анхааруулж байгаа. Тиймээс хэн, хэзээ, хаана халдвар авсан гэдгээ мэдэхгүйгээр хайртай дотны хүндээ халдвар тараах магадлалтай учир хүн бүр хувийн ариун цэвэр, халдвар хамгааллын дэглэмээ баримтлах хэрэгтэй юм.

УОК-оос “Хөдөө орон нутаг болон Улаанбаатар хотод гацсан иргэдийг тээвэрлэхдээ нийтийн хоолны газраар үйлчлүүлэх боломжгүй, мөн нэгдсэн журмаар бие засуулж, нарийн дэг журамтай зорчуулах болно” гэдгийг онцолсон. Үүнийг ч иргэд дагаж мөрдөх  учиртай.

Түүнчлэн шилжилт хөдөлгөөн хийсэн иргэд гэртээ очоод 14 хоног гэрийн тусгаарлалтад байх, үүний дараа давтан шинжилгээнд хамрагдах зэрэг иргэний үүрэг хариуцлага гэж зүйл бий. Энэ нь хэн нэгний төлөө бус зөвхөн өөрийнхөө болон хайртай дотны хүнээ хамгаалах хамгийн гол арга хэрэгсэл. 

“Би өвдвөл чи өвдөнө, чи өвдвөл бид өвдөнө”. Тиймээс халдварыг тараахгүй байхад иргэн бүрийн оролцоо чухал юм.

Б.Баатар