Эрчим хүчний сайдын тушаалаар бүх нийтийн бэлэн байдалд шилжсэн энэ үед айл өрхийн амьжиргааг дэмжих үүднээс цахилгааны төлбөрөө төлөх чадваргүй иргэдийн цахилгааныг таслахгүй байх шийдвэрийг гаргасан билээ. Мөн засвар үйлчилгээг ч үнэ төлбөргүй болгосон. Энэ нь иргэдэд ихээхэн дэмжлэг болж, ямартай ч тогтойгоо байхаар боллоо хэмээн олзуурхаж байв.

Гэтэл баярласан хэрээр бархирна гэгчээр сүүлийн үед цахилгааны үнийг хоёр дахин нэмсэн байна гэх гомдол холбогдох газруудад тасралтгүй ирэх болжээ.

Өмнө нь 50-52 мянгыг төлдөг байсан бол одоо 97 мянгыг төлөх төлбөрийн баримт ирсэн байх жишээтэй. Ганц бус олон айл өрх ийм байдалтайгаар яахаа мэдэхгүй сууна.

Холбогдох газрууд нь энэ талаар “Өмнө нь цахилгааны тоолуурыг нь харж бичдэг байсан. Харин одоо ийм боломжгүй учраас задгайгаар бичиж байгаа” гэжээ. Тодруулбал, тухайн айл өрхийн сүүлийн гурван сард төлсөн цахилгааны төлбөрийг дундажлан  тооцсон гэсэн үг аж.

Бэлэн байдлын зэрэгт шилжээд буй энэ цагт цахилгаанаа таслуулахгүйн гээд талархаж суусан иргэд  хөл хориог сулруулсны дараа, ажил үйлчилгээ нь эхэлсэн цагт төлбөрөө нөхөж төлж л таарна.

Харин тэр үед Эрчим хүчний сайдын гаргасан шийдвэр дэмжлэг бус эсрэгээрээ дарамт болж хувирна.

Төрийн байгууллагуудын баярлуулан гомдоодог энэ мэт шийдвэр олон. Тиймээс цахилгааны төлбөрийн дарамтыг чөлөөлөх гээд эсрэгээрээ нэмчихдэг нь доод шатны ажилтнуудынх нь  нугалаа байв уу, эсвэл, эрхэм сайдын нийтэд таалагдах гэсэн явуургүй хүсэл байв уу гэдэг нь удахгүй тодорхой болох биз ээ.

У.Тэргэл