Засгийн газрын хуралдаанаар зарим үйлчилгээний газруудыг нээсэн. Үүнтэй холбоотойгоор 17 градусаас доош согтууруулах ундааг худалдаанд гаргахаар болсон гэх мэдээлэл олон нийтийн дунд гараад байсан юм. Тэгвэл Улаанбаатар хотын Засаг дарга Д.Сумъяабазар арванхоёрдугаар сарын нэгнээс вино, пиво хуралдаалахгүй, иргэд 10 хоног тэсэх хэрэгтэй гэдгийг мэдэгдлээ.

Энэ талаар тэрбээр "Гэмт хэрэг, зөрчил, гэр бүлийн хүчирхийлэл зэрэг нь архи согтууруулах ундаанаас үүдэлтэй байдаг. Гэхдээ зохистой хэрэглэдэг олон хүн байгаа. Гэхдээ бид аливаа асуудлыг том зургаар харж, эрсдэлийг тооцоолох нь маш чухал. 

Улаанбаатар хотыг өндөржүүлсэн бэлэн байдлын зэрэг рүү шилжүүлбэл үйлчилгээний байгууллагуудыг үе шаттайгаар нээх талаар ярилцаж байсан. Гэвч Улаанбаатар хот өндөр эрсдэлтэй учраас архи дарстай холбоотой шийдвэр гарах нь эрсдэлтэй. Иргэд хөл хорионы дэглэмд байгаа гэдгээ ойлгож ухаарах хэрэгтэй. Бид мэргэжлийн байгууллагаас гаргасан шийдвэрт хүндэтгэлтэй хандаж, саналыг нь хүндэтгэн үзэх хэрэгтэй. Хүн согтууруулах ундааг гэртээ ганцаараа уухгүй нь ойлгомжтой. Тиймээс иргэд энэ 10 хоногийн хугацаанд тэвчээртэй байхыг хүсч байна. Архи согтууруулах ундаа худалдахгүй байгаагаас гарах сөрөг зүйл байгаа. Энэ байдлыг ашиглаж мөнгө олох гэсэн хүмүүс байгаад харамсаж байна. Архи уух үе бидэнд хангалттай байгаа. Гэр бүлээ эрсдэлд оруулахгүй төлөө 10 хоног тэсэх хэрэгтэй байна" гэв.

Мөн тэрбээр шагийн гэх архи согтууруулах ундаа худалдан борлуулж байгаа газар, иргэдэд хяналт тавьж, таслан зогсоохыг ЦЕГ-ын Нийтийн хэв журам хамгаалах газрын дарга И.Баттөгсд үүрэг болголоо. 

Б.Баатар