Монголын худалдаа эрхчлэгчдийн холбоо гэх тодотголтой цөөн хүмүүс өнөөдөр "Нарантуул" олон улсын худалдааны төвийн урд жагсаал зохион байгуулсан талаар бид өмнө нь мэдээлсэн билээ. Жагсаалыг Ардчилсан намын "Үзэсгэлэн гоо" хэмээн олонд танигдсан Т.Энхсайхан "толгойлсон" байсан юм.

Харин иргэд түүний хийж буй тэмцэл, шаардлагад үнэлэлт дүгнэлт өгөхөөсөө илүүтэй халдвар хамгааллын дэглэм баримтлаагүй ёс зүйгүй үйлдэлд нь ихээхэн шүүмжлэлтэй хандаж байна. Тодотговол, Монгол Улс дотооддоо коронавирусний халдвар алдаж, гамшгийн бэлэн байдлын зэрэгт шилжээд буй эл үед халдвар хамгааллын дэглэмийг сайтар сахиж, иргэдийг гэртээ байхыг албаныхан уриалж, шаардаж байгаа.

Гэтэл хуульч мэргэжилтэй, басхүү улстөр рүү “шагайж”, УИХ-ын сонгуульд хоёронтой нэр дэвшиж явсан эрхэм цар тахлын үед амны хаалт ч үгүй, олны өмнө ханиалгаж, тэмцэж байгаа нь олны дургүйцлийг төрүүлэв.

Олон нийтийн цахим сүлжээнд энэ талаар “Шударга ёсыг ингэж шаардахгүй, ядаж амны хаалтаа зүүх ёс зүйтэй байх хэрэгтэй. Жирийн үе бус, цар тахал гарсан эл үед жагсаал зохион байгуулах нь зохисгүй, халдвар хамгааллын дэглэм баримтлаагүй хүнд хариуцлага тооцох ёстой” гэхчлэнгээр байр сууриа илэрхийлж байна.

Монгол Улсын Ерөнхий сайд У.Хүрэлсүхийг шүүхэд өгч, худалдаачдынхаа хохирлыг барагдуулна хэмээж буй Т.Энхсайханы тэмцэл хэрхэн цааш үргэлжлэх бол гэдэг нь ч мөн олны анхааралд буй нь гарцаагүй юм.

Б.Баатар