Монгол Улсын Ерөнхийлөгч Х.Баттулга  Англи- Шведийн хамтарсан “Астразенека” эмийн үйлдвэрийн компанийн удирдлагуудтай цахимаар холбогдож,  боловсруулж буй коронавируст цар тахлын эсрэг вакциныг Монгол Улсад нийлүүлэх асуудлаар санал солилцсон.

Мөн  худалдан авах асуудлаар Засгийн газар, УОК-т чиглэл өгч, бэлтгэл ажлаа хангахыг зөвлөсөн талаарх мэдээлэл гарсны дараахан “Монос”-ын Л.Эрдэнэчимэг “Монос нь Английн “Астразенека” эмийн үйлдвэрийн Монгол дахь төлөөлөгч юм. Тэдний хийсэн ковидын эсрэг вакцин хамгийн хямд бөгөөд хадгалах нөхцөл энгийн. Манайхыг захиалгаа өг гэв. Бид Монголын нэрийн өмнөөс захиалгыг өгөх ёстой болоод байдаг” хэмээн жиргэсэн билээ.

Монголчуудын хувьд сайхан мэдээ. Гэвч Монголын талыг төлөөлж буй  “Монос” группт итгэж болох уу. Учир нь, цар тахал дэлхийд тархаж, манай улс дотооддоо хяналтаа чангатган халдвар хамгааллыг сахиж эхлэх үед амны хаалт, гар ариутгагч бодисын хэрэглээ ихэссэн.

Энэ үед мөнгө улаан нүд цагаан гэгчээр ашиг хонжоо хайж байсан нь “Монос” групп юм. Тодруулбал, тус группын харьяа зарим эмийн сан амны хаалтын үнийг нэмж, зориулалтын бус спиртээр гар ариутгагч найруулсныг холбогдох байгууллагууд тогтоосон.

Тодруулбал, МХЕГ-ын дэд дарга Г.Сугарбат “Нийслэлийн зургаан дүүргийн 18 аж ахуйн нэгжид хяналт, шалгалт хийхэд “Нахиа импекс”, “Монос” групп техникийн спиртээр гар ариутгагч хийсэн зөрчил илрүүлсэн” хэмээж байв. Ийм хариуцлагагүй, сэтгэлгүй үйлдлээс нь болж иргэдийн эрүүл мэнд, амь нас хохирсон бол яах вэ.

Техникийн спирт нь метилийн спирт юм. Голдуу ахуйн хүрээний цэвэрлэгээнд хэрэглэдэг, химийн хортой бодис. Хэрэглэсэн тохиолдолд хүний биед хордлогын шинж илэрч, бөөрөнд ачаалал өгч хүндрэл учруулдаг. Мөн амьсгал, зүрх судасны үйл ажиллагааг доголдуулж, үхэлд  ч хүргэх эрсдэлтэй гэдгийг мэргэжлийнхэн тодотгож хэлсэн байдаг.    

“Монос”-ынхон үе удмаараа эм зүйчид гэж хэлж болно. Тэд метилийн спирт хүний биед ямар хор уршигтайг мэдэхийн дээдээр мэднэ.

Мэдсээр байж үндэсний үйлдвэрлэлийн бараа, бүтээгдэхүүнээ дэмжих гэж цар тахлын үед худалдан авалт хийсэн хэрэглэгчдээ хохироохоо юман чинээ бодоогүй тэд биологийн зэвсэг гэгддэг вакцины худалдан авалтад ашиг хонжоо харахгүйгээр эх оронч сэтгэлээр хандаж чадах болов уу.

“Бид Монголын нэрийн өмнөөс захиалгаа өгөх болоод байдаг” гэж жиргэсэн Л.Эрдэнэчимэг та болон таны групп “Монос”-ын бус Монголын нэр гарна гэдгийг ухаарч байгаа юу. 

У.Тэргэл