Коронавирусний халдварт цар тахлын нөхцөл байдалтай холбогдуулан Улсын онцгой комиссоос гаргасан шийдвэрийн дагуу Улсын Их Хурлын үйл ажиллагаа цахим горимд шилжүүлээд байсан. Гэсэн ч гишүүд цахим хуралдаанд оролцохдоо портуал зургаа үлдээх, хуралдаанд оролцохгүй байх зэрэг асуудал гаргаж, олон нийтийн шүүмжлэлд өртөх болсон.

Үүнтэй холбоотой юу ямартай ч гишүүд чуулганы танхимдаа цугларах болжээ. Ингэхдээ чуулганы танхимыг гишүүдийн суудал суудлаар вакумжуулж, хорго хийсэн нь олны анхаарлыг татав.

УИХ-ын гишүүд өөрсдийгөө ийнхүү хамгаалж, халдвар хамгааллын дэглэм баримталж байгаа атлаа ард түмнээ хөсөр хаяж, хүний сэтгэлээр хамгаалж байна гэх шүүмжлэл олон нийтийн сүлжээнд гал мэт дүрэлзэж байна.

Тодруулбал коронавирусний халдвар тархаж, хөл хорио тогтоосноос хойш нийтийн тээвэрт багталцаж ядах иргэдийн дүр төрх хийгээд нөөцийн махан дээр дугаарлах иргэдийн халдвар хамгааллын нөхцөл байдлыг чуулганы танхимд хоргоны цаана суух гишүүдийн төрхтэй харьцуулсан байх аж. Түүнчлэн оюутан сурагчид “Ангидаа гишүүд шиг хоргонд тусгаарлагдаад хичээл номоо үзэх юмсан” хэмээн атаархлын үг “чулуудаж” эхэлжээ. 

Ямартай ч гишүүд коронавирусээс сэргийлэх хорготой болж, чуулганы хуралдаандаа сэтгэл амар суух боломж бүрдсэн бололтой. 

Б.Баатар