зургийг шог зураач С.Цогтбаяр

Өнгөрсөн ням гарагийн Засгийн газрын ээлжит бус хуралдаанаар зарим үйлдвэрийн газруудын үйл ажиллагааг нээсэнтэй холбогдуулан 18 градусаас доош төрлийн согтууруулах ундааг худалдаалахыг дэмжсэн хэмээн мэдэгдсэн.

Энэ тухай Хотын даргын нэгдүгээр орлогч Ж.Сандагсүрэн "Нийслэлийн хувьд энэ асуудлыг тэргүүн эгнээнд тавиагүй. Гэвч үйлдвэрлэлийн салбарыг нээж байгаа учир 18-аас доош градусын согтууруулах ундааг нээхийг дэмжиж байна" гэсэн байдаг. Хотын даргын нэгдүгээр орлогч согтууруулах ундааны төрлийн зүйл зарах тал дээр нийслэл ямар байр суурьтай байгааг Засгийн хурал дээр илэрхийлсэн гэж ойлгодог.

Гэвч хотын удирдлагууд нэгдсэн нэг бодлого, шийдвэргүй ярьдаг нь хотын даргын мэдэгдлээс харагдах нь тэр. Хэдхэн хоногийн өмнө нь хотын даргын нэгдүгээр орлогч нь нийслэл дэмжиж байгаа гэсэн мэдээллийг хотын дарга нь үгүйсгэснээр тэр шүү дээ. Тодруулбал,  “Хүн согтууруулах ундааг гэртээ ганцаараа уухгүй нь ойлгомжтой. Тиймээс иргэд энэ 10 хоногийн хугацаанд тэвчээртэй байхыг хүсч байна. Архи согтууруулах ундаа худалдахгүй байгаагаас гарах сөрөг зүйл байгаа. Энэ байдлыг ашиглаж мөнгө олох гэсэн хүмүүс байгаад харамсаж байна. Архи уух үе бидэнд хангалттай байгаа. Гэр бүлээ эрсдэлд оруулахгүй төлөө 10 хоног тэсэх хэрэгтэй байна” гэсэн юм.

Иргэд ч тэснэ л дээ. Гол нь хотын удирдлагууд нэг шугамаар, нэгдсэн мэдээлэл өгдөг болох хэрэгтэйг сануулъя. 

А.Сүх