УИХ-ын гишүүн Сумъяабазар   Нийслэлийн Засаг дарга бөгөөд Улаанбаатар хотын захирагчаар томилогдсонтой холбоотойгоор Сонгинохайрхан дүүрэгт нөхөн сонгууль явуулах шаардлагатай болсон. Харин одоогоор нөхөн сонгуулийн товыг УИХ-аар зарлаагүй байна.

УИХ-ын Төрийн байгуулалтын байнгын хорооны өчигдрийн хуралдаанаар энэхүү асуудлыг хэлэлцэх байсан ч долоо хоногоор хойшлуулах саналыг МАН-ын Бүлгийн дарга Д.Тогтохсүрэн гаргасан юм. Тэрбээр “Сонгуулийн тухай хуулиараа бол 50 хоногийн дотор нөхөн сонгуулийн товыг зарлах ёстой. Энэ нь тооцоод үзвэл, арванхоёрдугаар сарын 13 болж байгаа юм. Улс төрийн асуудал учраас тодорхой хүрээнд ярих, бэлтгэх ажил байгаа учраас хойшлуулж өгөөч гэсэн горимын санал гаргасан” гэв.

Одоогийн байдлаар, Сонгинохайран дүүргийн 28 дугаар тойргоос сонгогдсон хоёр гишүүн эзгүй байна. Тухайлбал, тус тойргоос сонгогдсон Д.Сумъяабазар гишүүн Нийслэлийн Засаг дарга бөгөөд Улаанбаатар хотын захирагч болсон бол Н.Учрал гишүүний бие тааруу байгаа аж.

Харин энэ хугацаанд намууд нөхөн сонгуульд нэр дэвшигчдээ эхний байдлаар тодруулжээ. Үүнд, МАН С.Мөнхчулууныг нэр дэвшүүлэх бол АН Г.Очирбатыг, МАХН Э.Батшугарыг нэр дэвшүүлэн өрсөлдүүлэхээр болж, өмгөөлөгч Х.Бат-Ялалт  бие даан нэр дэвшихээр болсон гэх мэдээлэл байна. Тэд 2020 оны УИХ-ын сонгуульд Сонгинохайрхан дүүргийн 28 дугаар тойрогт нэр дэвшсэн ч өвдөг шороодсон юм.

Сонгинохайрхан дүүргээс 2020 оны УИХ-ын сонгуульд хамгийн олон буюу 53651 саналыг Н.Учрал гишүүн авсан бол хоёрдугаарт, Д. Сумъяабазар 36785 саналаар, харин П.Анужин гишүүн 32031 саналаар гуравдугаарт бичигдэж, УИХ-ын гишүүнээр сонгогдсон юм. Харин МАХН-аас нэр дэвшсэн Э.Батшугар 22991 саналаар удаалсан. Зарим нам УИХ-ын нөхөн сонгуульд дараагийн хүнийг тодруулбал, Э.Батшугар гишүүн болох боломжтой хэмээн мэдэгдээд байгаа. Гэвч эрх баригч МАН нөхөн сонгуулийг товлон, зарлахаар болсон юм.  

Сонгинохайрхан дүүргийн 28 дугаар тойрогт болох нөхөн сонгуульд өрсөлдөх эрхмүүд өмнө хэчнээн сонгогчийн санал авсныг  эргэн сануулъя. Тухайлбал, С.Мөнхчулуун 11579, Г.Очирбат 10761, харин бие даан нэр дэвшихээр зэхээд буй Х.Бат-Ялалт 8112 хүний санал авчээ.