Сүүлийн хоёр хоногт нийслэл болон Сэлэнгэд тус бүр 6-7 тохиолдол бүртгэгдсэн. Хамгийн гол нь, эдгээр тохиолдол нь нэг гэр бүлийнхэн байгаа нь харамсалтай.

Тодруулбал, арванхоёрдугаар сарын 2-ны өдөр Хан-Уул  дүүрэгт илэрсэн зургаан тохиолдлын тав нь нэг гэр бүлийнхэн бол өнөөдөр Сэлэнгэ аймагт нэг гэр бүлийн таван хүн халдвар авсныг мэдээллээ.

Үүнээс харахад, гэр бүлийн хэн нэгний хэнэггүй, тоомжиргүй зангаас болж энэ бүхэн үүдэж буйг харж болно.

Тухайлбал, нийслэлийн хоёр том голомт болох “Энхсаран”, “Рапид мед” эмнэлгээр орж, гарсан Хан-Уул дүүргийн оршин суугч З нь өнөөдрийг хүртэл шинжилгээ өгөлгүй явж ирснээс гэр бүлийнхэндээ халдвар тараачихаад сууж байна.

Тэрбээр “Энхсаран” сувилал үйл ажиллагаа явуулж байх үед нь очиж засвар хийсэн, “Рэпид мед”-д тус эмнэлгийн эмчийн төрсөн өдөрт оролцсон байдаг.

Эрсдэлтэй хоёр голомтоор дээрх хоёр байгууллагыг өдөр шөнөгүй зарлан, үйлчлүүлсэн болон орж, гарсан бүх иргэнийг шинжилгээ өгөхийг ЭМЯ-наас байнга хүсч, удаа дараа анхааруулсаар атал өнөөдрийг хүртэл яагаад шинжилгээ өгч болоогүй вэ

. Хэрвээ тухайн үед шинжилгээ өгч халдварыг эрт илрүүлсэн бол эхнэр, хүүхдээ хамгаалж үлдэх байв. Тэрбээр өнөөдөр энэ бүхэнд гэмшиж байгаагаа хэлж байгаа ч бүх зүйл хэдийнэ болоод өнгөрчээ. Тиймээс иргэд энэ мэт жишээнээс сэрэмж авч, хайртай дотны бүхнээ эрсдэлээс хамгаалахын тулд гэрээсээ гарахгүй байх, амны хаалтаа зүүж, олон хүнтэй газраар явахгүй байхыг дахин сануулъя.

У.Тэргэл