Засгийн газраас Улаанбаатар хот болон хөдөө орон нутагт гацсан иргэдийг нутаг буцаах ажлыг зохион байгуулах ажлын хэсгийг байгуулсан билээ.  ЗТХЯ-ны Төрийн нарийн бичгийн дарга С.Батболдоор ахлуулсан ажлын хэсэгт ХЗДХЯ, ЭМЯ, ХХААХҮЯ-ны Төрийн нарийн бичгийн дарга нар багтсан ба хамтран зохион байгуулах үүрэг хүлээсэн байлаа. Гэвч өнөөдөр тэд ажил, үүргээ хэрхэн биелүүлсэн нь бүхний өмнө ил байна.

Нийслэлээс хөдөө орон нутаг руу явах иргэдээс шинжилгээ авах гэж өвлийн хүйтэнд олон цагаар гадаа дугаарлуулж, бөөгнөрөл үүсгэж, ихээхэн бухимдуулсан нь багадаад эцэстээ программ гацсан шалтгаанаар төлөвлөсөн бүх ажил талаар болсон юм.

 Төр, засагтай улс атал 100 мянга хүрэхгүй иргэнээс шинжилгээ авч, нутаг руу нь явуулах гэж хэдэн өдөр л гомдол, шүүмжлэл, бухимдал, уйлаан болов. Юун нөгөө халдвар хамгааллын дэглэм сахих вэ.

Азаар бүх хүний хариу сөрөг гарч, олон хүний сэтгэлийг тайвшрууллаа. Цаашдаа орон нутаг руу иргэдийг үргэлжлүүлэн явуулна, энэ мэт явдал яваандаа цэгцэрнэ гэж найдъя.

Хамгийн гол нь, Засгийн газрын тэргүүн яамдынхаа Төрийн нарийн бичгийн дарга нарт хариуцлагатай энэ ажлыг хариуцуулсан ч харин тэд нь төр, түмний итгэлийг шороотой хутгаад хаячихлаа. Тиймээс Ерөнхий сайд та, ажлын хэсгийг ахалсан, бүрэлдэхүүнд нь багтсан дарга нартаа ямар хариуцлага тооцох вэ. Таны үг тэдэнд ийм үнэ цэнэгүй юү эсвэл, тэдний чадвар ердөө л энэ үү. Хариулт авмаар байна.

У.Тэргэл