Манай улсад коронавирусний халдварын дотоодын тохиолдол бүртгэгдсэнээс хойш 386 хүн халдвар авч, коронавирусээр өвчлөөд буй. Эдгээр хүмүүсийн хавьтлыг тогтоох ажил үргэлжилж байгаа гэдгийг албаныхан мэдээлж байгаа.

Харин халдвар хаанаас, аль байрнаас, хэнийхээс илрэв гэх асуулт олон нийтийн дунд хөвөрч, үүнээсээ үүдэж, халдвар авсан иргэдийг ялгаварлан гадуурхах, гэрийнх нь цонх руу чулуу шидэх, тэр бүү хэл амьдарч байсан гэрээс нь хөөх тохиолдол хүртэл гарч байна гэдгийг албанхан мэдээллээ.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа "Хан-Уул дүүргийн дөрөвдүгээр хорооны нутагт голомт үүссэн. Энэ голомтоос гэр бүлийн болон найз нөхдийн хүрээний 20 орчим тохиолдол батлагдсан. Иймд бид тухайн голомтот хэсгийг тойрсон гудамжуудад хөл хорио тогтоогоод байгаа.

Ер нь халдвар аваад эмнэлэгт хэвтэж байгаа иргэний гэрийн хаягийг хэлэхээр тэд над руу залгаж гомдол мэдүүлдэг. Учир нь иргэд энэ айлаас халдвар гарсан гээд хүүхдүүдийг хүртэл амьдарч байсан гэрээс нь хөөж явуулах тохиолдол гарсан.

Мөн танайхаас халдвар гарлаа гээд цонх руу чулуу шидэж байна. Энэ байдал нь буруу. Агаар дуслын замаар дамждаг COVID-19-ийн халдвараар хэн ч өвдөх эрсдэлтэй тул халдвар авсан иргэдийг ялгаварлан гадуурхахгүй байх хэрэгтэй. Бид өвдсөн хүмүүсээ хамгаалах үүрэгтэй. Иймд хөл хорио тогтоосон газрын яг хаанаас нь халдвар илэрснийг дахин дахин хэлэхийг албаны хүмүүсээс шаардахгүй байхыг хүсье" гэсэн юм.

О.Сэлэнгэ: Хөл хориотой холбоотойгоор хүүхэд хамгааллын асуудал хөндөгдөж байна

Түүнчлэн  хөл хориотой холбоотойгоор хүүхэд хамгааллын асуудал хөндөгдөж байгаа гэдгийг ч Гэр бүл, хүүхэд хөгжлийн газрын Залуучуудын хөгжлийн газрын дарга О.Сэлэнгэ онцолсон. Тэрбээр "Баянзүрх дүүрэгт коронавирусээр өвчилсөн эмэгтэй хоёр хүүхдийг гэрт нь оруулахгүй байна гэх мэдээлэл ирсэн.

Тиймээс мэргэжлийн баг гарч ажиллахад оршин суугчид болон СӨХ-ныхон нь тусгаарлах байрнаас гарсан хоёр хүүхдийг гэрт нь оруулахгүй гэсэн асуудал гарсан байсан. Тиймээс түр хамгаалах байран дээрээ авсан. Цар тахалтай тэмцэх тухай хуульд халдварт өвчин туссан иргэдийг ялгаварлан гадуурхахгүй байх тухай заасан байдаг. 

Хөл хориотой холбоотойгоор хүүхэд хамгааллын асуудал хөндөгдөж байна. Сэлэнгэ аймагт гэхэд 148 хүүхэд хараа хяналтгүй болсон. Тэдгээр хүүхдүүдийг түр хамгаалах асуудлыг шийдэж байна. Хүүхэд хамгааллын тусламжийн утас болох 108 дугаарын утас 24 цагийн турш ажиллаж байгаа" гэдгийг тодотгосон юм. 

Тиймээс хэлж бус хийсч ирдэг өвчин, цар тахлын үед нэгнээ ялгаварлан гадуурхаж, сэтгэл санааны дарамтанд оруулахгүй байх нь чухал юм. Энэ талаар ч халдвар авсан жолооч "Коронавирусээр өвчилсөндөө бус халдвар авч, гадуур тараасан гэх үгнээс нь айж байна" хэмээсэн байсан билээ. 

Б.Бат