Ерөнхий сайдын зөвлөх А.Үйлстөгөлдөрийн ажлын өрөөнд нь дуу, дүрс бичлэгийн өндөр нягтралтай камер суурилуулсан байсныг өнөөдөр олж илрүүлсэн байна. Нууц камерыг  компьютерийн сүлжээний мушгиралдсан олон утсан дунд нуун байршуулсан байжээ. Уг асуудлаар зөвлөх А.Үйлстөгөлдөр тагнуул, цагдаагийн байгууллагад өргөдөл гаргасан ба Тагнуулын байгууллага шуурхай шалгаж эхэлсэн байна.

Үдээс хойшх мэдээллээр, Засгийн газрын компьютер технологийн  ажилтан нэгэн залуу тус камерыг байршуулсан гэдгээ хүлээн зөвшөөрсөн гэж мэдээлэл байна. Харин хэн тавихыг тушаасан, ямар шалтгаан үндэслэлээр камер байршуулсныг нарийвчлан шалгаж эхэлжээ.

Үүнээс өмнө ЗГХЭГ-ын дарга Л.Оюун-Эрдэнийг мөн тагнаж, чагнасан ба эл хэрэгт тагнуулын арав гаруй ажилтанг холбогдуулан шалгасан. Тэд албан ажил, оффисын өрөөнд нь тагнаж, чагнах төхөөрөмж суулгаж, гадуурх бүх уулзалтыг нь хүртэл баримтжуулж байсан гэдэг. Тагнуулын ерөнхий газрын дарга асан Л.Гэрэлийн тушаал зааврын дагуу тагнаж, чагнасан гэх мэдээлэл тухайн үед гарч байв. Л.Гэрэл дарга албан тушаалаасаа өөрийн хүсэлтээр чөлөөлөгдсөн гэдэг ч үнэн чанартаа дарамт шахалтад орсны улмаас ажлаа өгсөн гэдэг.

Мөн МАН-ын дарга, Ерөнхий сайд У.Хүрэлсүхийг тагнаж, чагнаж, олон өдөр мөрдөн мөшгисөн гэх дуулиан хэсэгтээ олны анхаарлын төвд байсан билээ. Эл хэрэгт есөн хүнийг сэжигтнээр татан шалгаж, Ерөнхий сайд асан Ж.Эрдэнэбатыг холбогдуулан шалгасан ч нотлогдоогүй юм. Харин эцэстээ У.Хүрэлсүх өөрөө энэ бүхнийг зохион байгуулсан болоод дууссан. Энэ мэтчилэн адал явдалт кинон дээр гардаг үйл явдал л манай улс төрийн хүрээнд тасралтгүй өрнөсөөр байна.