Даатгалын компаниуд “Ковид-19” эрүүл мэндийн даатгалын үйлчилгээг хувь хүн болоод албан байгууллага, аж ахуйн нэгжүүдэд санал болгоод эхэлчихжээ. Коронавирусний цар тахал хэдийд бүрмөсөн намжихыг, эрсдэлээс эмээхгүй амьдрахыг өнөөдөр хэн ч хэлж мэдэхгүй энэ цагт даатгуулах нь “Ковид-19”- өөс өөрийгөө болон гэр бүлээ, хамт олноо хамгаалах бас нэгэн чухал алхам байж болох юм.
Халдварыг дотоодоо алдсанаас хойш энэхүү үйлчилгээг даатгалын арав орчим байгууллагаас тал хувь нь энэхүү үйлчилгээг үйлчлүүлэгчдэдээ санал болгож, иргэд ч эхнээсээ гэр бүлээ, хувь хүн өөрийгөө даатгуулаад эхэлчихжээ. Харин өнөөдрийн байдлаар байгууллагынхаа ажилтнуудыг даатгуулах нь ховор байгаа аж.
Юуны өмнө “Ковид-19”-ийн эрүүл мэндийн даатгалыг нэвтрүүлээд буй “Бодь даатгал”-ынхантай холбогдлоо. Тэд эрүүл мэндийн даатгалдаа “COVID-19 хамгаалалт” гэсэн цэс нээн ажиллуулж байгаа ба цахимаар даатгалд хамрагдах боломжтой гэлээ. Гэр бүлийн гишүүн бүрийг насаар нь тус тусад нь даатгалд хамруулахаар зааж, жилийн хугацаанд даатгуулах үнийг санал болгожээ. Тухайлбал, нас бүр дээр гурван багц санал болгож байгаа ба тус бүрийн үнийг танилцуулъя.
-0-10 насны хүүхэд - 390 000, 460 000, 550 000 төгрөг
- 20-29 насныхан - 410 000, 530 000, 610 000 төгрөг
- 30-39 насныхан – 540 000, 660 000, 810 000 төгрөг
-40-49 насныхан – 670 000, 860 000, 970 000
50-иас дээш насныхан- 880 000, 1,280 000, 1,680 000 төгрөг байна.
Энэ талаар bodi-insurance.com хаягаар орж дэлгэрэнгүй мэдээлэл авах боломжтой юм байна.
Цаашлаад Мандал даатгал, Ард даатгал зэрэг компаниуд ч мөн “COVID-19” даатгалыг санал болгоод эхэлсэн байна. Тэдний хувьд харьцангуй хямд буюу хувь хүн 30 мянга, гэр бүлээрээ даатгуулах бол 90 мянган төгрөгөөр хагас жилээс нэг жил хүртэлх хугацаагаар даатгуулахыг санал болгож байгаа аж. Харин байгууллагаа 150-200 мянган төгрөгөөр даатгуулах боломжийг олгожээ. Хэрэв гэр бүлээрээ даатгуулсан тохиолдолд хэн нэг нь коронавирусний халдвар авбал 1-2 сая төгрөгийн нөхөн төлбөр олгоно. Халдвар авч эмчлүүлээд дахин өвчилсөн тохиолдолд 3-5 сая төгрөгийн нөхөн төлбөр олгох зэргээр даатгалын компаниуд тус бүрдээ өөр өөрийн үнийг тогтоожээ. Эдгээр компаниудын хувьд монголчуудын амьжиргааны төвшин ямар байгаатай уялдуулан уян хатан үнийг санал болгожээ.
Харин “Бодь даатгал” компанийн хувьд бусдаас харьцангуй өндөр үнэтэй байгаа нь дан ганц коронавирус бус архаг хууч өвчин, гэнэтийн хагалгаа зэрэг эрүүл мэндтэй холбоотой бүхий асуудал “COVID-19 хамгаалалт” цэсэнд багтаж байгаа учраас тэр гэнэ. Мөн даатгуулснаар эрсдэлд орвол 10, 30, 50 сая төгрөгийн нөхөн төлбөр авах боломжтой юм байна.
У.Тэргэл
