Гадаадад гацсан монголчууд хөдөлгөөний тэргүүн Э.Одбаярыг шөнийн 04:00 цагийн үед гэрээс нь хууль бусаар хүч хэрэглэн баривчилсан гэх мэдээлэл олны анхаарлыг татаж байна.

Тодруулбал, Гадаадад гацсан монголчууд  хөдөлгөөний цахим хуудсанд "Хатуу хөл хорионы үеэр Э.Одбаярыг шөнө дөлөөр цагдаа, прокурорын бичиггүйгээр хүч хэрэглэн баривчилж, хууль зөрчлөө. Өчигдөр /2020.12.06/ тэрбээр Зон олны намын даргаар дөнгөж сонгогдсон бөгөөд ЗОН-ын байрлуу цагдаа нар шүүх прокурорын зөвшөөрөлгүй дайрч орсон. Түүнийг өмнө нь удаа дараа баривчлан саатуулж байв" гэх мэдээллийг нэгэн бичлэгийн хамт цацжээ. 

Энэ талаар ХЗДХ сайд Х.Нямбаатар "Э.Одбаярыг баривчлаагүй. Ямар зорилгоор ийм худал мэдээлэл тараагаад байна" гэх хариулт өгсөн бол ЦЕГ-ын хэвлэл мэдээллийн төвийн дарга Б.Баатархүү "Э.Одбаяр нь 2020 оны 12-дугаар сарын 6-7-нд шилжих шөнө дөрвөн цагийн үед Сүхбаатар дүүргийн нэгдүгээр хороонд байрлах, ЗОН-ын мэдээллийн төв дээр архидан согтуурсан үндэслэлээр иргэдээс ирсэн гомдлын дагуу эрүүлжүүлэгдсэн байна" хэмээн мэдэгджээ. 

Харин хүч хэрэглэгдсэн саатуулагдсан гэх дуулианы эзэн болоод буй Э.Одбаяр өөрийн цахим хуудаснаа "Шөнө орон байр руу прокурорын зөвшөөрөлгүй нэвтэрч, үзлэг нэгжлэг хийж, хэсэг рүү авч явна гэсэн. Эрхзүйн туслалцаа авахыг хүсэхэд чиглэлээ өөрчилж, эрүүл хүнийг "эрүүлжүүлж" дэлгэсэн. Б.Баатархүү нэгэнт нэр хүндэд халдаж байгаа бол согтолтын зэрэг мэдээлчих. Надад бас мэдээлэх зүйл байна" гэжээ.

Ямартай ч олны анхаарал татаад буй эл асуудлын талаар бид эргэн мэдээлэх болно.