“Энхсаран” сувилалд болсон үйл явц давтагдаж болзошгүй нөхцөл байдал үүсчээ. Учир нь, III, IV хороололд байрлах “Алтай” зочид буудалд дотооддоо халдвар илэрсэн тухай мэдээлэл байна. Өчигдөр орой тус буудлаас 27 хүнийг ХӨСҮТ-рүү яаралтай шилжүүлсэн ба найман автомашинаар авч явжээ.

Зочид буудалд төмөр замын ажилтны ойрын хавьтал болох хүмүүсийг тусгаарласан байсан гэсэн мэдээ байна. Тэднийг тусгаарлалтад 14 хонуулна, шинжилгээний хариу сөрөг гарвал гаргана гэж байсан ч өнөөдрийн байдлаар хүмүүс 17-18 хоножээ.

Иргэдээс багадаа дөрөв, ихдээ долоон удаа PCR шинжилгээ авч бүгд сөрөг гарсан ч яагаад гаргахгүй байгаагийн учрыг ойлгохгүй байгаа аж. Учир нь, энэ талаар асуухад эмч, онцгой байдлын алба хаагчид мэдэхгүй хэмээн бие бие рүүгээ чихдэг байжээ.

Тус зочид буудлын өрөө хүйтэн, хоол муутайн дээр эргэлт огт оруулахаа больжээ. Тусгаарлалтад байгаа хүмүүс ч шөнө оройн цагаар гэнэт 27 иргэнийг нүүлгэн шилжүүлсний учрыг гайхан, ямартай ч халдвар илэрчээ гэсэн таамаг дэвшүүлж суугаа аж.

Тиймдээ өнөөдөр хоол идэхгүй, халуунаа ч үзүүлэхгүй байгаа гэнэ. Учир нь, тусгаарлалтад байгаа иргэдэд хоолыг нь зөөдөг хүнээс халдвар илэрсэн гэх мэдээ чих дэлсчээ. Үүнийг батлах мэт өмнө ажиллаж байсан хоол зөөгч, онцгой байдлын ажилтан, тогооч нарыг бүгдийг сольжээ.

Дотор байгаа иргэнтэй холбогдоход  “ Бидэнд ямар ч мэдээлэл алга. Юу болсон талаар хэн ч мэдээлэл өгөхгүй байна. Өчигдөр орой эмнэлгийн 7-8 тэрэг ирж 27 хүнийг гэнэт авч явсан. Бүгдийнх нь хариу эерэг гарсан гэж дууллаа. Гэхдээ ийм олноороо арай үгүй байлгүй гэж горьдож сууна. Миний хувьд 17 хонож байна. Ажил дээрээ гурав, энд ирээд дөрвөн удаа PCR шинжилгээ өгсөн ч бүгд сөрөг гарсан.

14 хоноод хариу сөрөг гарвал гаргана гэсэн болохоор эргэлтээр ирсэн хоол хүнсээ дуусгачихсан. Гэтэл эргэлт оруулахгүй, хэзээ гаргах нь ч тодорхойгүй байна. Буудлын ариун цэвэр үнэхээр муу. Тиймээс би байнга хувцастайгаа унтаж байгаа. Өнөөдрийн байдлаар энэ зочид буудлыг анхаарах хүн алга. Хаягдчихсан хүмүүс л байна” гэв. 

Мөн тусгаарлалтад байгаа иргэн “Бид үнэхээр айдастай байна. Гаднаас эргэлт оруулахгүй, энд нярай хүүхэдтэй эмэгтэй уйлаад л байна. Дам сураг сонсвол, хоол зөөж байсан хүн юм уу тогоочоос халдвар илэрсэн гэж байна. Миний хувьд ирээд 18 хонож байна. Зургаан удаа PCR шинжилгээ өгч бүгд сөрөг гарсан. Ажлаасаа шууд энд ирсэн” гэв.

Өнөөдрийн байдлаар тус зочид буудалд ариутгал халдваргүйжүүлэлт хийсэн байна. Хамгийн гол нь, юу болсон талаар хэн ч ямар ч мэдээлэл өгөхгүй байгаа нь тэднийг улам айдаст автуулжээ. Ямартай ч, энэ талаарх мэдээллийг үргэлжлүүлэн хүргэх болно.

У.Тэргэл