Дэлхийн эрүүл мэндийн байгууллагаас цар тахал гэж зарласан “Ковид-19” дэгдээд жилийн хугацааг үдэж байна. Урд хөршид анх бүртгэгдсэн энэхүү цар тахлаас манай улс урьдчилан сэргийлж, хоёрдугаар сараас хязгаарлалт хийж эхэлсэн. Сургууль, цэцэрлэгийг онлайн сургалтад шилжүүлж, сургалтын төвүүдийг хааж, гадаадаас ирэх иргэддээ хатуу хяналт тавьсан.

Ингэхдээ өдөр бүр хэвлэлийн хурал зарлаж цар тахлын талаар мэдээлэл хийдэг байв. Санаж байгаа бол Д.Сарангэрэл сайдын үед хийдэг байсан тэдгээр хурлуудын гол пиар нь “Дотооддоо халдвар алдаагүй гарын арван хуруунд багтах цөөхөн орны нэг нь Монгол” гэдэгт чиглэж байсан юм.

Энэ пиараа тусгаарлах байранд байгаа иргэд хоолоо голлоо гэсэн гоншигносон үгээр чимэхээ ч тэд мартаагүй.

Дэлхийд байхгүй олон хоногийн тусгаарлалтыг эх орноо зорин ирсэн иргэдээсээ шаардаж байсан ч тусгаарлах байр нь халдвар хамгаалалтын хатуу дүрэм журмыг зөрчиж дотоодын халдварын анхны тохиолдол тэндээс илэрсэн.

Хэрвээ дотоодод халдвар алдсан гэх хэлж байгаа хугацаа нь үнэн бол шүү дээ. Энэ хугацаанд хэвлэлийн хурлаар монголчууддаа танигдсан хүний нэг нь Улсын онцгой комиссын Шуурхай штабын дарга бөгөөд ОБЕГ-ын дэд дарга, хурандаа Б.Ууганбаяр. Сүүлийн арван сар Шуурхай штабыг ахлаж ажиллаж байгаа Б.Ууганбаяр хурандаа хэвлэлийн хурлын үеэр хоолны орц, халуун хүйтнийг ярьдаг байсанд бухимдсан иргэд түүнийг “Гоншигносон хурандаа” гэж хочлоод авсан ч удаатай.

Тэгвэл Улсын Онцгой Комиссын Шуурхай штабын дарга, хурандаа Б.Ууганбаяр энэ хочоо жинхэнээсээ баталчихлаа.

Тусгаарлах байрнаас дотоодын анхны халдвар илэрсэн байж магадгүй байхад тусгаарлах байруудыг хариуцах ажил үүргийн хуваарьтай хурандаа “Төр бол ард түмэн. Тусгаарлах байранд алдсан халдварын хариуцлагыг хамдтаа хүлээе” гэж хэлж байна.

Тэрбээр өчигдөр urug.mn сайтын хэлэлцүүлэгт оролцохдоо цар тахлын хариуцлагыг ард түмэнтэйгээ хамтдаа хүлээе гэсэн хариуцлагагүй үгийг унагасан билээ.

С.Сүлд