“Эрдэнэс Монгол” компанийг нэг тэргүүн дэд захирал, гурван дэд захиралтай байхаар бүтцийн өөрчлөлт хийсэн билээ. Тэгвэл тус компанийн дэд захирлын албан тушаалд томилогдох хүмүүсийн нэр тодорч эхлэв.
Одоогоор УИХ-ын Тамгын газрын Ерөнхий нарийн бичгийн дарга асан Ц.Цолмон, МАН-ын бүлгийн даргын зөвлөх Л.Хосбаяр, УИХ-ын гишүүн асан Л.Энхболд нарын гурван хүний хувийн ашиг сонирхлын урьдчилсан мэдүүлгийг хянуулахаар АТГ-т шилжүүлсэн байна. АТГ-аас тэдний хувийн ашиг сонирхлын урьдчилсан мэдүүлгийг хянаж, “Эрдэнэс Монгол” компанийн дэд захирлын албан тушаалд томилоход ашиг сонирхлын зөрчил үүсэх эсэхэд дүгнэлт гаргах юм.
“Эрдэнэс Монгол” компанийн дэд захиралд горилогч Ц.Цолмон нь АНУ, Англи, ОХУ-д сургууль төгссөн, төрийн албанд олон жил ажилласан туршлагатай нэгэн. Мөн горилогч Л.Энхболд нь ОХУ-д сургууль төгссөн, дөрвөн жил УИХ-ын гишүүнээр ажилласан туршлагатай. Гэвч ЖДҮХС-гийн зээлийн асуудалд холбогдсон нь түүнийг сонгуульд дахин нэр дэвшүүлэхгүй байх үндэслэл болсон юм. Горилогч Л.Хосбаяр нь УИХ-ын гишүүний зөвлөх, бизнесмен нэгэн. Ингээд тэдний товч намтрыг танилцуулъя.
Ц.Цолмон гэж хэн бэ?
Мэргэжил, боловсрол: Эрхзүйч мэргэжилтэй. Хууль зүйн ухааны магистр
- 1980-1988 онд нийслэлийн 52 дугаар дунд сургууль,
- 1988-1992 онд ОХУ-ын Омск хотод технологийн техникум,
- 1994-1998 онд МУИС-ийн Хууль зүйн дээд сургууль төгссөн.
- 2001-2003 онд Их Британийн Эксетерийн их сургуульд хууль зүйн мастер,
- 2013-2014 онд АНУ-ын Колумбын их сургуульд хууль зүйн мастер тус тус хамгаалсан байна.
Ажлын туршлага:
- 1993-1994 онд УИХ-ын Тамгын газарт компьютер операторч,
- 1998-2001 онд МУИС-ийн Хууль зүйн дээд сургуульд багш,
- 2004-2013 онд Хууль зүй, дотоод хэргийн яаманд Хууль зүйн бодлогын газрын дарга,
- 2011-2016 онд Монголын өмгөөлөгчдийн холбоонд өмгөөлөгч,
- 2016-2019 онд УИХ-ын Тамгын газрын ерөнхий нарийн бичгийн даргаар тус тус ажиллажээ.
Л.Энхболд гэж хэн бэ?
Мэргэжил, боловсрол: Эрхзүйч, эдийн засагч мэргэжилтэй
- 1989 онд Өмнөговь аймгийн 1-р арван жилийн сургууль
- 1993 онд ЗХУ, Краснодар хотын их сургуулийг цахилгааны инженер
- 1999 онд МУИС.Эдийн засгийн сургуулийг нягтлан бодогч, эдийн засагч
- 2007 онд Тагнуулын ерөнхий газрын дээд сургуулийг эрх зүйч мэргэжлээр тус тус төгссөн.
Ажлын туршлага:
- 2002-2005 онд “Ди Энд Эл групп” ХХК-ийг үүсгэн байгуулагч, захирал
- 2004 оноос “Монгол говийн хөгжил сан” ТББ-ыг үүсгэн байгуулж, тэргүүлэгчээр
- 2005-2007 онд “Өмнөговийн залуучуудын хөгжлийн төв” ТББ-ын тэргүүн
- 2007 онд “JCI Capital”-ийн ерөнхийлөгч
- 2012 оноос Өмнөговь аймгийн ИТХ-ын төлөөлөгч
- 2016 оноос Монгол Улсын Их Хурлын гишүүн
Л.Хосбаяр гэж хэн бэ?
Л.Хосбаяр нь УИХ дахь МАН-ын бүлгийн дарга Д.Тогтохсүрэнгийн зөвлөхөөр ажилладаг, бизнесмен нэгэн. Тэрээр УИХ-ын гишүүн С.Ганбаатарыг МҮЭХ-ны ерөнхийлөгчөөр ажиллаж байхад нь туслахаар ажиллаж байжээ. Мөн "Мон Лаа" компанийн гүйцэтгэх захирлын албан тушаалтай нэгэн.
