Засгийн газраас айл өрх, албан байгууллагуудын цахилгааны төлбөрийг ирэх долоодугаар сарын 1-нийг хүртэл тэглэсэн. Үүнтэй холбоотойгоор айл өрхийн цахилгааны хэрэглээ эрс нэмэгдсэн байна. Үүнээс үүдэн гарах эрсдэл болоод хэрэглэгчид хэрэглээндээ хэрхэн анхаарах талаар Диспетчерийн үндэсний төв ХХК-ийн Диспетчерийн албаны дарга О.Наранбаатартай ярилцлаа.

-Засгийн газрын шийдвэр гарсны дараагаас цахилгааны хэрэглээ эрс нэмэгдсэн гэлээ. Одоо нөхцөл байдал ямар байна вэ

-Төвийн бүсийн нэгдсэн сүлжээний оргил ачааллын үе буюу 18-20 цагт цахилгааны хэрэглээ 1215 МВт хүрч, өссөн. Үүнийг нэг жилийн өмнөхтэй харьцуулбал 105, өмнөх өдөртэй нь харьцуулахад 50 орчим МВт-аар өссөн гэсэн үг юм. Ердийн өдрүүдэд 1160 орчим байдаг хэрэглээ 50-иар өсөхөд л ачаалал үүсч, эрсдэл үүсэх нөхцөл бий болдог. Хэрэглэгчид үнэгүй юм гээд цахилгааны хэрэглээгээ хэтрүүлж, нэмэлтээр халаагуур залгах зэргээр ачааллыг зохиомлоор нэмж байна. Трансформатор ачааллаа дийлэхгүй, шугам, кабель хална. Үүнээс үүдэн галын аюул учирч болзошгүй эрсдэлтэй нөхцөл үүснэ. Мөн бид эрчим хүч үйлдвэрлэгч орон. Хэрэглээг нэмснээр үйлдвэрлэж чадахгүйд хүрч, хэмжээндээ тулбал станцууд гэмтэж болзошгүй юм.

-Өчигдөр гэхэд л трансформатор шатсан шүү дээ. Одоо хэвийн ажиллаж байгаа юү. Цаашид ийм явдал давтагдаж болзошгүй. Ийм эрсдэлийг тооцсон уу

-Тийм явдал болсон. Өчигдрийн хувьд засварласан ч өнөөдөр хаана, ямар газарт ийм байдал үүсэхийг таашгүй. Манай монтёрууд нэгээс нөгөө рүү явж засварлахад хугацаа шаардана. Энэ хооронд айл өрх, албан байгууллага тоггүй байна гэсэн үг. Тиймээс өөрсдөдөө учирч болзошгүй энэ мэт эрсдэлийг тооцон сэргийлэх хэрэгтэй байна. Бидний хамгийн гол айдас бол, галын аюул байна. Гэр хороололд олон айл нэг шугмаас салаалж, цахилгаанаа татдаг. Хоёр плитка залгаж байгаад гурав болоход л ачаалал нэмэгдчихэж байгаа юм.

-Эрчим хүчний салбар цахилгаан дамжуулах тоноглолуудаа шинэчилсэн үү. Хуучин нь ачаалал даахгүйгээс эрсдэлийг нэмэгдүүлэхэд нөлөөлж байж болох уу

-Тэр болгон бүгдийг шинэчилж амжихгүй. Шинэ нь ч, хуучин нь ч байгаа. Улаанбаатар хот тэлж байна, тэр хэрээр хэрэглэгчдийн тоо өдрөөс өдөрт нэмэгдэж байна. Тиймээс цахилгааны хэрэглээ ч дагаад өснө.

-Дан ганц айл өрх бус албан байгууллагуудад ч энэ хамааралтай байж таарна.

-Тэгэлгүй яах вэ. Аж ахуйн нэгжүүд өрөө хүйтэн байна гээд халаагуур залгаад орхиод явчихдаг. Энэ нь галын аюултайгаас гадна хэрэглээг эрс нэмнэ.

-Ер нь ахуйн ямар хэрэгсэл цахилгаан их зарцуулдаг юм бэ

-Плитка, ус буцалгагч, тень буюу халаагуур, индүү зэрэг халдаг төхөөрөмж цахилгаан их зарцуулдаг. Өчигдрөөс ажиглаад байхад тень, халаагуурын сурталчилгаа  явах нь нэмэгдчихлээ. Хэдийгээр хэрэглээ ч гэлээ хэтрүүлбэл хаа, хаанаа эрсдэл үүснэ гэдгийг л дахин хэлье.

-Эрчим хүчний салбар хэрэглэгчдийнхээ тог цахилгааныг доголдуулахгүйн төлөө чадлаараа ажиллана гэлээ. Харин одоо хэрэглэгчдийн ухамсар л чухал болоод байна, тийм үү

-Энэ л хамгийн чухал байна. Эрчим хүчний салбарынхан өндөржүүлсэн бэлэн байдалд ажиллаж байна. Бид чадлаараа л хичээж ажиллана. Гэхдээ хэрэглэгчдээс маш их зүйл шалтгаална гэдгийг  л сайтар ойлгох хэрэгтэй байна. Өмнөх өдрүүдийн адил цахилгаанаа ашиглахад л болно. Ингэснээр  улсдаа, өөрсдөдөө, гэр бүлдээ их тус дэм болж байна гэсэн үг юм. Би л гэж хувиа хичээн замбараагүй хэрэглээд байвал ганц та бус олон олон айл өрх, цаашлаад улс орноороо эрсдэлд орох нөхцөл үүсч болзошгүй. Гэхдээ энэ нь сэрэмжлүүлэг, анхааруулга болохоос ард иргэдэд айдас төрүүлэх гээгүйг мөн ойлгоорой.

 -Эрчим хүчинд зохицуулалт хийх журмыг батална гэсэн. Энэ тухай мэдээлэл танд байна уу

-Эрчим хүчний яам л энэ асуудлыг мэдэх байх.

У.Тэргэл