Ерөнхий сайд У.Хүрэлсүх “Эрдэнэт үйлдвэр” ТӨҮГ-ын захирал Х.Бадамсүрэнд “балагаа баллуурдах” сайхан боломж олголоо.

“Ковид-19” өвчнийг манай улс дотооддоо алдахаас өмнөх хэдэн долоо хоногт иргэн Б.Цогтгэрэлийн өөрийн сошиал хуудсаар хүргэж байсан Шилэн дансны мэдээлэл олны анхаарлыг татаад байсан билээ.

Тодотговол Эрдэнэтийн захирал Х.Бадамсүрэнгийн охиныхоо сургалтын төлбөрөөс эхлээд олон зуун сая төгрөгийн тансаглал нь ил болж, суудлаас нь буулгах тухай асуудал хүртэл хөндөгдөж байв. Харамсалтай нь дотооддоо алдсан цар тахал Эрдэнэтийн захирлуудын тансаглалын дуулианыг хэсэг нам гүмд аваачсан юм.

Үнэхээр эл цар тахал Эрдэнэтийн удирдлагуудад зол болов. ТӨҮГ-ын мөнгөөр тансаглаж, үр ашиггүй үрэн таран хийсэн хэмээн "баалуулж" явсан эрхмүүд өдгөө ОД болон гялалзаж эхэллээ.

Монгол Улсын Засгийн газраас энэ сарын 1-нээс эхлэн ирэх оны долдугаар сарын 1-н хүртэл айл өрх, зарим аж ахуйн нэгжийн цахилгаан, ус, дулааны төлбөрийг тэглэх шийдвэр гаргасан. Үүнд шаардлагатай 650 тэрбум төгрөгийг Эрдэнэт үйлдвэрээс гаргахаар болсон нь Х.Бадамсүрэнд таатай боломж олголоо гэхэд нэг их хилсдэхгүй биз.

Цахилгаан, дулааны мөнгийг тэглэхэд гарах зардлыг хариуцах болсон Эрдэнэт үйлдвэр болон шахмал түлшний үнийг 75 хувь хөнгөлөх боломж олгож буй “Эрдэнэс тавантолгой” ХК-ийн удирдлагуудад иргэд төдийгүй сайд нар хүртэл талархал илэрхийлж, сайшааж эхэллээ.

Тухайлбал, УУХҮ сайд Г.Ёндон “Салбарын нэр хүндийг өндөрт өргөж яваа баялаг бүтээгч салбарынхандаа болон дээрх хоёр компанийн удирдлага, ажилтнуудад хандан улс, орон нутгийн төсвийг бүрдүүлэхээс гадна цар тахлын хүнд нөхцөл байдалд байгаа аж ахуйн нэгж, ард иргэдийн нуруун дээрх ачааллыг хөнгөлж, бодит дэмжлэг үзүүлж буйд яам, агентлагийн нийт ажилтан, иргэд, аж ахуйн нэгжийн нэрийн өмнөөс талархал илэрхийлье” хэмээжээ.

Үнэхээр ч талархаж, сайшаах явдал гэдэгтэй санал нийлэх хүн олон. Гэхдээ эл ажлыг нэр төртэй зохион байгуулж, өмнөх "балагаа баллуурдахгүй" бол, төрийн мөнгөөр тансаглаж явсан Х.Бадамсүрэн нарын дуулиан ор мөргүй алга болоогүй гэдгийг санахад илүүдэхгүй буй за.

Б.Баатар