Монгол Улсын Ерөнхийлөгч Х.Баттулга он солигдох мөчид ард иргэддээ мэндчилгээ дэвшүүлэхдээ “Туурга тусгаар Монгол Улсын хөгжил дэвшлийн төлөө залуу насаа зориулсан ахмад буурлуудаа өрийн дарамтаас салгах зорилгоор алдагдсан байсан Салхитын мөнгөний ордоо эдийн засгийн эргэлтэд оруулах замаар тэтгэврийн зээлийг нэг удаа тэглэх тухай Үндэсний Аюулгүй байдлын зөвлөлийн гишүүд санал нэгдэн шийдвэр гаргасныг он солигдох энэ мөчид ахмадууд та бүхэндээ дуулгаж байгаадаа баяртай байна” гэж мэдэгдсэн. 

Үүнээс хойш зээл тавиагүй ахмадууд хохирч үлдэх юм уу гэсэн шүүмжлэл ихээр явсан учраас зээлгүй, зээлтэй ч зээлээ төлж дууссан ахмадуудад 2021 оны тавдугаар сарын 1-нээс 194 мянган ахмадад нэг сая төгрөгийн үнэт цаас  хэлбэрээр олгох хуулийг баталсан билээ. Үүнд 900 орчим тэрбум төгрөг шаардлагатай гэж байв.

Гэвч найдлага тавьсан Салхитын мөнгөний ордод бонд, хөрөнгө босгох ажил  одоог хүртэл ахиц гараагүй, гарах үгүй нь ч тодорхойгүй байна. Монгол Улсын Ерөнхийлөгч саяхан нэг сая төгрөг амлаад дэмжлэг авч чадаагүй ч хамгийн гол нь өмнө амласнаа биелүүлэх хэрэгтэй байна.  

Ерөнхийлөгчийн хувьд амласан сая төгрөгөө хэзээ, хэрхэн өгөх нь тодорхойгүй болж,  Сангийн яам асуудлыг өөрөөсөө зайлуулж, төрийн өмчит “Эрдэнэс монгол” компанийн мэдэх хэрэг хэмээн булзааруулаад эхэлсэн нь энэ бүгдийг баталж байна. Хатуугаар хэлэхэд, Ерөнхийлөгч Х.Баттулгын Ахмадын зээл хөтөлбөр үндсэндээ зогссон гэхэд дэгсдүүлсэн болохгүй биз.  

У.Тэргэл