Энэ сарын 16-ны Франкфуртын нислэгт нэгэн эмэгтэйг халдвартай гэх шалтгаанаар онгоцонд суулгаагүй үлдээсэн нь олон нийтийн анхаарлыг татаад байгаа билээ.

Монгол Улсаас ХБНГУ-д суугаа ЭСЯ-наас болсон явдлын талаар тодорхой тайлбар бүхий мэдээлэл гаргаж, тухайн эмэгтэйд туслаж, дэмжиж байгаа гэдгээ мэдэгдсэн талаар бид өмнө нь мэдээлсэн билээ.

Тэгвэл тусгай үүргийн онгоцонд багтаж чадаагүй үлдсэн Ц.Цэцэгбал өөрийн цахим хуудсаар дамжуулан дараах тайлбарыг хийжээ.

Тэрбээр "Би арванхоёрдугаар сарын 16-ны өдөр Франкфуртын онгоцонд сууж чадаагүй. Учир нь миний ковидын шинжилгээ эерэг гарсан. Тиймээс ХБНГУ-д суугаа Элчин сайд н.Батбилэг ирж, надад тусгаарлах байранд орохыг санал болгосон. Гэвч би арванхоёрдугаар сарын 17-ны онгоцонд суухаар үлдсэн боловч бас л сууж чадаагүй. Тиймээс ЭСЯ-наас надад шаардлагатай бүхий л туслалцааг үзүүлсэн. 

Орчуулга, буцаад Чех явуулах талаар хөөцөлдөх, тусгаарлах байранд оруулах зэрэг асуудалд анхаарч ажиллаж байсан. Тухайн үед би халуураад байсан учраас буруу ойлголцоод татгалзсан. 

Мөн ЭСЯ, МИАТ-ийн найман ажилтан тизний 800 гаруй еврог өгөхийг санал болгосон ч дахин билет авч чадахгүй байх гэж айгаад бас татгалзсан. Ингээд хоёр хоног онгоцны буудалд хоносон. Энэ үед Германд байгаа хоёр залуу ирж тусалсан. Мөн хоёр газраас нөхцөл байдлын маань талаар ярилцлага авсан. Түүнчлэн Герман Улсаас Солонго гэдэг хүн холбогдоод өнөөдрийг хүртэл тусалж байна. Би халдвартай учраас 14 хоног энд тусгаарлагдах болсон. Би монгол айлд байгаа. Тэр үед Монголкомментоос холбогдсон. Гэвч би энэ байгаа айлаа бодоод буудалд байгаа гэж худлаа хэлсэн. Би буудалд огт очоогүй. Онгоцны буудлаас шууд энэ айлд ирсэн. Одоогоор биеийн байдал сайн байгаа. Германы элчин сайдын яамнаас боломжтой бүх арга хэмжээг авч тусалж байгаа. Айлд одоогоор үнэгүй байрлаж байгаа. Одоог хүртэл тусалж дэмжиж байгаа бүх хүмүүстээ маш их баярлалаа" хэмээв. 

Б.Баатар