Д.Нямхүү захирал салбарынхаа сайдтай ХӨСҮТ-ийн коронавирусний халдвартай өвчтөнүүдийг бусад эмнэлэг рүү шилжүүлэхгүй хэмээн зөрүүдэлж, ихээхэн маргаан үүсгээд байгаа сурагтай. ХӨСҮТ-ийг бүрэн суллаж, бүхлээр нь ариутгал, халдваргүйжүүлэлт хийх зайлшгүй шаардлага үүссэн тул салбарынх нь сайд ийм шийдвэр гаргасан ч тэрбээр эсэргүүцсээр өнөөдрийг хүрчээ.

Өнгөрсөн хугацаанд ХӨСҮТ-ийн 20 орчим эмч, ажилтан халдвар аваад буй. Үүнийг эмч, ажилтнууд хамгаалах хувцсаа буруу тайлж, өмсөн халдвар хамгааллыг дэглэмийг сайтар сахихгүй байгаагаас  гэж анх үзсэн.

Харин эцэстээ нэг жилийн орчмын хугацаанд олон зуун халдвартай өвчтөнг хэвтэн эмчлүүлж байснаас орчин бүхэлдээ эрдсэлтэй болсон, бохирдсон хэмээн үзэж, нийтээр нь суллан ариутгал, халдваргүйжүүлэлтийг хийхээр болсон юм. Энэхүү шийдвэрийг гаргах болсон бас нэг шалтгаан нь ХЗДХЯ, МХЕГ, ЭМЯ-ны  баг хамтарсан шалгалтыг ХӨСҮТ-д хийсэн ба үр дүн нь ихээхэн ноцтой гарсан талаар мэдээлээд өнгөрсөн.

Тухайлбал, эмнэлгийн орчин бохир, халдвар, хамгаалалт муу, хэвтэн эмчлүүлэгсдийн тасаг эрүүл ахуйн стандартын шаардлага хангахгүй байгаагаас халдвар тараах эрсдэл өндөр гарсан гэж зах зухаас нь албаныхан хэлж буй.

Тиймдээ ч тус эмнэлэгт эмчлүүлж байгаа өвчтөнүүдийг Яармагийн 300 ортой шинэ эмнэлэг рүү, заримыг нь Цэргийн төв госпитал руу хуваан шилжүүлэхээр Эрүүл мэндийн сайд Т.Мөнхсайхан тушаал гаргасан ч Д.Нямхүү эмч эсэргүүцэн, тэдний дунд үл ойлголцол үүссэн байна. Харин эцэст нь өвчтөнүүдийг хуваан шилжүүлж, харин Д.Нямхүү захирал 80 орчим өвчтөнг авч үлдэж чаджээ.

Дэлхийд аюулт цар тахал дэгдэж, монголчууд дотооддоо халдварыг алдсан хүнд энэ цагт Д.Нямхүү захирлын туршлага, дадлага хамгаас чухал. Тиймдээ ч өнгөрсөн хугацаанд баг, хамт олноо удирдан коронавирусний халдвартай олон зуун өвчтөнг эмчилж, эдгээсэн ачтан.

Харамсалтай нь, тэрбээр нөхцөл байдал ямар байгааг, шалгалтын дүн ноцтой гарсныг сайтар мэдсээр байж, салбарынхаа сайдын гаргасан шийдвэрийг үл ойшоон зөрүүдэлж суугааг хэрхэн ойлгох вэ. Харин ч төр, засгаас анхаарч эмнэлгийг бүрэн ариутган, засварлаж өгье гэхэд үгүй гээд байгаа нь хоосон эмнэлэгтэй үлдэхийг хүсээгүйтэй холбоотой юү, эсвэл ХӨСҮТ-дөө халдвартай бүх хүнийг эмчилж, эдгээсэн нэр зүүх гэсэн үү ямартай ч, түүний энэ араншинг ойлгох ухаан алга.

У.Тэргэл